Rojda Aydin

 

AGIRÎ - Zîndanê Tîpê Lyê Panosî de 40 gardîyanan hêrişê tepişteyanê bi nameyê Mizgîn Kayitbey, Lale Kabîşen û Nazlican Barişer kerdî. Mîzgîna ke bi rayîrê telefonî agahî da keyeyî, telefon reyke de ameyo birnayîş. Dayîka aye Seyhan Kayitbey derheqê babete de venga hişyarî rayaumûmî rê kerd û vat: "Vengê tutanê ma bieşnawê."

 

Zîndanê Tîpê Lyê Panosî de tepişteyê bi nameyê Mizgîn Kayitbey, Lale Kabîşen û Nazlican Barişere 31ê Tebaxe de îtîrazê ameyîşê gardîyanê camêrdan ê seba hûmartişî kerdî. Tepişteyan dîyar kerdî ke camêrdî nêeşkenê bikewê raşteyê taybetî yê cinîyan û dimayê serebûtî cinîyan waşt bi dozgerî reyde pêvînayîşî bikerê. La ame redkerdiş. Cinîyan serebût protesto kerdî û komêke gardiyan yê 40 kesî pê ameyîne hêriş berdî serê tepişteyanê cinîyan û nêzdîyê 40 deqeyî îşkence tepişteyan rê kerdî. Goreyê agahîyan zî tepişteyî 4 saetan bi la ameyê girêdayîş.

 

Dayîka Mizgîne, Seyhan Kayitbey ke roja îne yanî vizêrî bi kênaya xo reyde bi rayîrê telefonî pêvînayîş kerd û kênaya aye qalê çîyê ameyê ciwîyayîş kerda.  Seyhane zî ajansê ma rê qisey kerd û serebûtê ke pê ameyî qalî kerd.

 

Destûr nêame dayîş pêvînayîş bikerê

 

Seyhane, da zanayîş ke cezaya muebbetî ya giran derheqê kênaya aye de ameyo birnayîş û bi 7 serrî yo zîndan de yena tepiştiş û vat, ê roja dişeme şîyê pêvînayîşê akerde û rayîr de erebeyê înan xira bîyo û pêvînayîşî rê erey mendê. Seyhane, dîyar kerd ke gardîyanan înan ra vato bi sebebê erey mendê nêeşkenê pêvînayîş bikerê û wina vat: “Gardîyanan destûr nêdayî ma pêvînayîş bikerê û ma ra vatî ‘Şêrê dozgerî reyde qisey bikerê’. Ma reaksîyon mojna zî destûr nêdayî ma bi kênaya xo reyde pêvînayîş bikerê. Nê ser de ma şî bi dozgerî reyde pêvînayîş kerd, la cayê xo de nêbî. Şewirmendê ci bi dozgerî reyde pêvînayîş kerd û ame ma ra vat, ‘Dozgerî vano heqê înan esto ke şêrê pêvînayîş bikerê. Wa şêrê bi midûrê zîndanî reyde qisey bikerê û vajê eşkenê pêvînayîş bikerê.’ Dimayê nê ma şî zîndan û gardîyanan ra vat û înan zî midûr ra vat. Mudurî vat, ‘ma rê kaxidêk nêameyo û ma destûr nêdanê pêvînayîş bikerê.’ Ma nêeşkayî pêvînayîş bikerê. Ma uca de reyna reaksîyon mojna. Ma dima ra mecbûr agêrayî.”

 

Îşkence û tacîz 

 

Seyrane da zanayîş ke roja îne kênaya aye bi telefonî aye gêraya û vatî ke zîndan de tedayêk xeylê gird esta. Seyrane wina qalê pêvînayîşê bi kênaya xo reyde kerd û vat: “Kênaya mi lez bi lez ma rê qalê çîyan nêkena. La na reye cîya bî. Kênaya mi bi rayîrê telefonî vat ‘Rewşa ma xirab a. Îşkence bi ma kerdî. Badê nê hêrişî ganî tu kesêk deqeyêk û sanîyeyêk nêvindero. Wa heme avûkat, baro, wekîl û rojnamegerî bêrî tîya û vengê ma bieşnawê. Wa êdî tu kes nêvindero. No hêriş nêmaneno hêrişanê bînan. Mudirê nê cayî xeylê hov o û xirab o. Qaşo yenê cigêrayîş kenê, la cigêrayîş nêkenê. Êdî şima fehm bikerê. Dozgerîye rê ma waştişname nuşt la cewab nêda. Ma bi îmkananê xo protesto kerd. Seba ke ma protesto kerd mudir şî û bi 40 gardîyanan reyde agêra. Bi çopan hêrişê ma kerdî. Porê ma antî û îşkence bi ma kerdî. 40 deqeyan îşkence bi ma kerdî. Ma çimanê xo akerd û dî ke ma nêweşxane de yê. Îşkence vera hîşê ma şî û ma xora şîyî. Doktor raporê derbî da û destur nêdayî ke doktorê bîn biewnî ma. Coka ra ma bi lezubez ardî zîndan. Rewşa ma krîtîk a. Zîndan de min û her di tepişteyê bînî tacîz kenê.”

 

Telefon reyêk de birîya 

 

Seyhane da zanayîş ke mîyanê 3 aşman de 9 reyan cezaya hucreyî dîyaya kênaya aye û wina vat: “ Wexto ke ma bi telefonî qisey kenê telefon hema rew rey de birîyeno. Hema ma 3-4 deqayê ma estbî ke wextê ma biqedîyo. Ez paweyê ci menda ke reyna bigêra, la nêgêraye. No 3 reyo ke hêrişê înan kenê. La her game teda bi kênaya mi kenê. Tewr peynî seba ke deyîr vata 11 roje cezaya hucreyî dîyaya kênaya mi. Tîya 15 roje verê cû cezaya aye qedîya. Wa heme kes vengê tutanê ma bieşnawo.”