Rabîa Onver

 

COLEMÊRG - Kurdistan de demê peyênan de cenazeyê HPGyîyan bi kargoyan, qutîyan de yenê şirawitiş. Endamê Meclîsê Dayîkanê Aştîye yê Geverî reaksîyon mojnayî rewşe û vatî: “Wazenê dejê keyeyan teze bikerê. Ma êdî nêwazenê cenazeyê parçekerde qutîyan de bi kargoyan bêrê erşawitiş.”

 

Kurdistan de demê peyênan de cenazeyê HPGyîyan yê ke nimuneyê DNAye ameyî dayîş zî badê xeylê serran yenê dayîş. Cenazeyê ke xeylê serran ra dima yenê dayîş qutîyan de bi kargo yenê şirawitiş. Îqtîdar bi nê caardişan dejê keyeyan hîna giran keno. Cenazeya Yilmaz Uzunî (Tolhildan Tekman) ke serra 2020î de Sêrt de netîceyê hêrişê hewayî de tewrê 5 embazanê xo dinyaya xo bedilnabî, mîyanê qutîyêk de bi kargoyî şirawîya keyeyê ci rê. Keye 3 serrî verê cû nimuneyê DNAye dabî û dimayê hîrê serran bi kargo cenaze ame şirawitiş. 

 

Meclîsê Dayîkê Aştîye yê Geverî raksîyon nîşanê rewşe da û dîyar kerd ke bi nê caardişan hewl danê dejê keyeyan hîna zêde bikerê. 

 

‘Netîceyê têkoşînê azadîye de dinyaya xo bedilnayî’

 

Gulçîn Karabuke dîyar kerd ke tutê înan netîceyê têkoşînê azadîye de seba aştîye dinyaya xo bedilnenê û vat ke ganî cenaze bi kargoyan teslîmê keyeyan nêrê kerdiş û vat: “Keye hem nimuneyê gonî danî hem zî badê xeylê serran cenaze yenê dayîş. Sebebê nê çîyî ma zî nêzanê. Çîyo ke ma baş zanê no yo ke wazenê dej bi ma bidê antiş. Mîyanê şertê normalî de ganî 3-4 aşman mîyan de cenaze bidîyê keyeyan. La wina nêkenê bi serran goristanê bêkesan de danê vindertiş. Bi kargoyan qutîyan mîyan de cenaze yenê şirawitiş. Wijdanê înan çin o. Ma nê caardişan qebul nêkenê.”

 

‘No îşkence bi dayîkan yeno kerdiş’ 

 

Saadet Dogmaye zî ard ziwan ke aye tutanê xo mîyanê şertê giranan de pîl kerda û Kurdistan de mergê tutan zaf asan o û vat: “Ma venga dewlete kenê. Çîyo ke kenê canê keyeyan vêşneno. No îşkence bi dadîyan yeno kerdiş. Ê zî tutanê keyeyan ê, guna yê. Dewlete cenazeyê înan parçe parçe kena û şirawena. Dadî û pîyê înan zî estê. Êdî bes o. Wa no îşkence peynî bibo.” 

 

‘Ma şermizar kenê’ 

 

Emîne Atake dî dîyar kerd ke aye şirawitişê cenazeyan ê bi kargoyî şermizar kena û vat ke ganî no îşkenceyo ke bi keyeyan yeno kerdiş nêro qebulkerdiş û qiseykerdişê xo wina peynî kerd: “Çîyo ke dewlete kena îşkence yo. Her çend ke keye nimuneyê DNAye bidê zî bi serran cenaze yenê vindertiş. Dimayê serran cenaze bi kargoyî şirawîyenê. Ma nê çîyî şermizar kenê. No eyb û guna yo.”