AMED - Kader Gulsuna ke krîzê ekonomîye vera fek mektebî ra vera da wina vat: “Wa komel bibo wayîrê fikrî, bêveng nêmano û qisey bikero. Seba ke ma bêveng ê, ma na rewşe de yê.” 

 

Krîzê ekonomîye vera şar rojê zehmetinan ciwîyeno û qet şik çin o ke nê prosesî de kesê ke tewr zêde krîzî ra tesîr benê cinî û ciwan ê. wezxto ke krîz ciwîyeno kesê ke ewil kar ra yenê vetiş cinî û ciwan zî bi bahaneyê tecrubeyê înan çin o nêgirîyenê kar yan zî sey hêzê erjan ê karî yenê dîyîş. Vera nê de ciwanî mecbur manenê bikewê rayîrê teberê welatî. Kader Gulsuna 19 serrî ke qezaya Surî ya Amedî de bi rotişê kincan û kincê otantîkan îdareyê xo kena dîyar kerd ke krîz vera mecbur menda ke fek mektebî ra vera bida. 

 

‘Embazê mi şinê mekteb, ez xebetîyena’ 

 

Kadere dîyar kerd ke fek mektebî ra vera daya û ewnîyena keyeyê xo û wina vat: “3-4 serrî yo ke ez bi karê bazirganîye reyde meşgul bena. Lîseye de mi fek mektebî ra vera da. Pere çinîbî ez kitab û defter bigêra. Ez şîyêne mekteb û vêşan mendêne. Bi 5 lîreyî çîyêk nêameyêne girewtiş. Coka ra mi fek mektebî ra vera da. Ez xebetîyena. Ez nika teberî ra wanena. Cuya sosyalî sifir a. serê sibayî ez saaet 09.00î de yena dikan akena. Şewe zî ez saet 22.00î de dikan gêna. Wext nêmaneno. Embazê mi şinê mekteb, ez xebetîyena.”

 

‘Ez 19 serrî ya la sîyaset qisey kena’ 

 

Kadere ard ziwan ke nê emrî de berpirsîyarîya aye zaf ê û wina dewam kerd: “Problemê weşîye û perwerdeyî estê. Zehmetîyê cuye estê. Ez 19 serrî ya la sîyaset qisey kena. Sîstemê perwerdeyî, weşîye û yê bînî heme rijîyayî. Her çî vaye bîyo. Vaye vera mi fek mektebî ra vera da. Merdim bêfikr yeno verdayîş. Nêwanenê. Tersenê. Wexto ke îqtîdar yeno rexnekerdiş teda yeno kerdiş. Tu şekil azadîya çapemenîye çin a. Kam çîyêk vajo hema bi lez şirawenê zîndanan.” 

 

‘Wa komel bêveng nêmano’ 

 

Kadere qiseykerdişê xo wina qedênaye: “Tedaya serê kurdan vera mecbur manenê wareyanê xo terk bikerê. Ma welatê Kurdistanî terk nêkenê. Terkkerdiş zehmet o. esnaftîye de nizdîbîyayîşê cînsîyetperestî zaf zêde yo. Ma cinîyî nêeşkenê asan têbigêrê. Ma mecbur manenê xo bikerê rolê camêrdan. Ma nêeşkenê kincan goreyê zerrîya xo xora bidê. Ma timî xo mîyanê rol û senaryoyan de vînenê. Wa cinî qîmetê xo bizana. Wa komel bibo wayîrê fikr û qisey bikero. Bêveng memanê. Seba ke ma bêveng ê, ma kewtî na rewşe.”