AMED - Cinîyan derheqê weçînayîşê herêmî ke do 31ê Adara 2024î de pê bêro de qisey kerdî û rexneyê xo yê seba şaredarîya bîyaye ardî ziwan û qala çîyê ke ê pawenê kerdî. 

 

Bajarê Kurdan de serra 2016î ra nata caardişê tayînkerdişê qeyûman dewam keno û hemwelatijê ke nê bajaran de ciwîyenê reaksîyonê xo sey roja ewile mojnenê. Bajarê ke qeyûm tayînê înan ameyî kerdiş ra yew zî Amed o. Cinîyê Amedî verê weçînayîşê 31ê Adara 2024î reaksîyonê xo ardî ziwan û qala waştişê xo yê partîyan ra yê ke kewenê weçînayîşî kerd. 

 

 ‘Wa dewlete qeyûm tayînê şaredarîyê ma nêkera’ 

 

Cinîya bi nameyê Helma Kaplane dîyar kerd ke şaredarî wezîfeyê xo nêanê ca û dewe de seba ke dewijî çopê xo bierzê rayîrêk derg rayra şinê û bale natî serê tayînkerdişê qeyûman: “Şaredarîyê ke qeyûm tayînê înan ameyî kerdiş pakî nêkenê. Ma qeyûman qebul nêkenê.”

 

 ‘Ma rayîrberîya şaredarîye qebul nêkenî’ 

 

 Pakîze Tamere zî dîyar kerd ke şaredarîyê qeyûman tu xebatêk nêkenê û vat ke ê kesê ke nika şaredarî de xebetîyenê û selahîyetdarê nêwazenê. Pakîzeye nê çîyan ard ziwan: “Şaredarîye tu çîyêk ma rê nêkerda. Ma TOKÎyan de mexdur kerdî. Verê berê ma de lembe daxî çinî yo. Şaredarî çilayêk daxî nêtafînena. Dingê ma çin o. Dingê wesayîtî berdî cor. Ma bi nê emrî de hende rayra şinê. Bazar çin o. Raşteyê mîyanenî de yew serrî yo cereyan çin o. Ma telefon kenê la kesêk cewab nêdano. Awe yena birnayîş. Her roje yena birnayîş. Saetanê şewe de ma nêewtanenê şêrî teber. Her ca bi kutikan pir o. ma yew xêrêk şaredarîye ra nêdî. Her ca bîyo sergo. Ma nê îdarekaran qebul nêkenê.” 

 

 ‘Ganî qeyûm nerê tayînkerdiş’ 

 

 Seda Ayilmaze zî ercnayîşê xo de dîyar kerd ke ganî weçînayîşo ke nizdî beno rê qeyûm nêro tayînkerdiş û derheqê babete de wina vat: “Ma tena şaredarîye ra yew çî pawenê. Ma wazenê ke dorme pakî bibo. Çike ma tîya de ronişenê. Ma wazenê Amed pak bibo. Ganî qeyûm nêrî tayînkerdiş. Kam qezenc bikero wa o bimano.”

 

 ‘Pakî çin a’ 

 

 Selma Yakute zî ercnayîşê xo de nê çîyan ard ziwan û wina vat: “Çîyo ke ma weçînayîşê 2024î ra pawenê pakî ya. Pakîya şaredarîye çin a. Nameyê dingan çin o. Stargehê heywanan çin o. Awe û werd seba heywanan çin o. No lazimîyêk pêroyî yo. Şaredarî her babete de qels a. Ma wazenê Amed pak bibo. Sîyaset çîyêk cîya yo. Xizmetê şaredarîye yê seba şarî muhîm o.”