AMED - Kesê ke xo rê vatî polîs ê şîyî keye û cayê karî yê 16 rojnamegeran ke serra verêne bi îdîayê endamtîya rêxistine ameybî tepiştiş û yew serrî ra dima ameybî tehlîyekerdiş û înan tacîz kerdbî. Rojnameger Safîye Alagaşe derheqê babete de qisey kerd û da zanayîş ke amacê înan no yo ke hewayê ters û şikî awan bikerê. 

 

8ê Hezîrana 2022yî de çarçeweya cipersayîşo ke Serdozgerîya Komare ya Amedî dabî destpêkerdiş de 16 rojnamegerî bi îdîayê endamtîya rêxistine 15ê hezîrane de ameybî tepiştiş. Mudira Karê Nuştişî ya JINNEWSî Safîye Alagaşa ke dosyayê aye rojnamegeranê bînan ra ameybî cîyakerdiş 15ê Hezîrane de serbest ameye verdayîş û 15 rojnamegerê bînî zî 11ê Temmuze de roniştişê ewilîn de serbest ameyî verdayîş. Zext û tacîzê hemverê rojnamegeran dewam keno. 

 

Safîye Alagaşe derheqê zextan de qisey kerd û da zanayîş ke vera heme zextan xebatê xo dewam kenê.

 

‘Kesê ke xo rê vanî polîs persê ma kenê’ 

 

Safîyeye da zanayîş ke aye yew aşme 15 embazanê xo yê bînan ra ver serbest ameye verdayîş û ard ziwan ke her çend ke yew aşm û nîme serbestverdayîşê aye sero ra derbaz bibo zî kesê ke xo rê vanê polîs înan tacîz kenê. Safîyeye wina dewam kerd: “Şinê cayê karê ma, şinê keyeyê ma rê vanê ma polîs ê. Persê ma kenê û vanê tîya de ronişenê yan nê, çi karî kenê, xebetîyenê yan nê. Tay keyeyê embazanê ma ra hûmara telefonê înan waştî.”

 

‘Amac zextê psîkolojîk o’ 

 

Safîyeye sewbîna ard ziwan ke ê nêzanenê ke qey polîsî înan persenê û derheqê babete de tu malumatê înan çin o û vat ke avûkatê aye serê Merkezê Resnayîşî yê Serekomarîye (CÎMER) muracat kerdo. Safîyeye qiseykerdişê xo wina dewam kerd: “Amacê nê caardişan zextê psîkolojîk o. Ma yew serrî bi hawayêkê bêhuqûqî tepişte mendî. Roniştişê ewilîn de ma serbest ameyî verdayîş. Yew serrî ma nêvetî mehkema. Amacê tepiştişê ma no bî ke vernîya xebatanê ma bigîrê. Çîyo ke nika yeno kerdiş zî no yo.” 

 

 ‘Wazenê ters û şikan awan bikerê’

 

Safîyeye peynîya qiseykerdişê xo de da zanayîş ke kesê ke xo rê vanê polîs bi amacê awankerdişê ters û şikan, bi amacê zextê psîkolojîk pê bîyarî şinê keye û cayê karê înan û wina peynî kerd: “Şîyî cayê karê mi la zanê ke ez uca de nêxebetîyena. Xebatkarê awanîye ra persê ‘tîya de ronişena, se kena’ kerdî. La adresê mi eşkera yo. Qey şinê cayê karî de persê mi kenê? Wazenê hem mi ser de û hem zî serê embazanê mi de ters û şikan awan bikerê. No vera xebata mi de tacîz o. Eynî wext de zextê psîkolojîk ê hemverê embazanê min o.”