Dîlan Babat

 

ANQARA - Însîyatîfê Şarî ra Fatma Bostan Unsale têkoşînê edeletî yê Emîne Şenyaşare ercna û vat: "Xoresnayîşê edaletî sey suc yeno dîyîş. Waştişê Emîne Şenyaşare sey suc yeno dîyîş. No zî edaletî qels keno.”

 

Emîne Şenyaşare mêrde û di lajê xo 14ê Hezîrana 2018î de qezaya Pirsûsî ya Rihaye de netîceyê hêrişê pawitox û merdimê parlementerê AKPyî yê verêne Îbrahîm Halîl Yildizî de vînî kerd û lajê aye yê parlementerê Partîya Çep a Keske yê Riha Ferît Şenyaşarî zî bi birîndarî hêrişî ra xelisîyabî. Keyeyê Şenyaşarî Nobeda Edaletî ya Rihayî roja 848î de berdbî Anqara. No 41 roje yo ke keye wezîr Yilmaz Tunçî reyde nêameyo têkişt. 

 

Çalakîya Nobeda Edaletî ya keyeyê Şenyaşarî hetê dezgeh, komele, rêxistinê cinîyan ra paştîdayîş vînena. Polîsê ke mudaxale kenê, nêverdenê kesêk nizdîyê keyeyî bibo. Rojanê verênan de însîyatîfê şarî ra Fatma Bostan Unsala ke waşte bi keyeyî reyde Nobeda Edaletî bigêra, bi mudaxaleyê polîsan reyde ameye rî bi rî û nêverdayî şêra kişta Wezîrîya Edaletî. 

 

Endama Însîyatîfê Şarî ra Fatma Bostan Unsale derheqê cipersayîşê edaletî yê keyeyê Şenyaşarî de ercnayîş kerd.

 

‘Ma nizdîyê Emîne Şenyaşare nêkenê’ 

 

Fatmaye da zanayîş ke têkoşînê edaletî yê keyeyê Şenyaşarî derheqê sîstemê edaletî yê Tirkîya de yo û wina dewam kerd: “Têkoşînê edaletî yê keyeyê Şenyaşarî mexdurîyetêk giran îfade keno. Weçînayîşê 2018î de bîlasebeb dikanê keyeyê Şenyaşarî de qewimîyayîş yeno ciwîyayîş û qewimîyayîş dikan de qedîyeno. Nêweşxane de bi hovîtîyêk gird mêrdeyê Emîne Şenyaşare yeno qetilkerdiş. Di lajê ci yenê qetilkerdiş. Bi nê çîyî zî sînor nêmendî lajêk ci zî erzenê zîndan. Dayîkêk ke wazena no qetlîyam bi adîlane bêro muhakemekerdiş zî esta. Têkoşînê aye dewam keno. Ma wazenê paştîdayîşê Emîne Şenyaşare bikerê la nêverdenê ma nizdî bibê.”

 

‘Ma ameyî astengkerdiş’ 

 

Fatmaye dîyar kerd ke Tirkîya çend serrî verê cû derheqê planê heqê merdiman de Yewîtîya Ewropaye paştîdayîşê ekonomîye girewta û yew amacê nê paştîdayîşî no bî ke merdim xo bi asanî biresnê heqê merdiman û wina dewam kerd: “Dadîyêk seba edaletî waşt bi wezîrê edaletî reyde bêra têkişt. La waştişê aye yê edaletî yê heqdar nîno caardiş. Kesê ke wazenê kişta Emîne Şanyaşare de bê, yenê astengkerdiş. Ma 4 kesî nêeşkenê kişta aye de rayra şêrê. Çar kesî sîstemê îstîmlakî nêxerepnenê.” 

 

‘Vatişê wezîrê edaletî bêtalih ê’ 

 

Fatmaye qiseykerdişê xo yê peyênan de nê çîyan vat: “Bawerîya bi dezgehê Tirkîyaye kêm bîya. No astengî şikê derheqê edaletî de zêde kerdo. Ez qiseykerdişê wezîrê wedaletî yê sey ‘Ez nêwazena pêvînayîş bikera’ bê talihî vînena. Amacê yewine ê dezgehê tewr şenik edalet o. Eke no zî nêro destfînayîş dewlete û komel asîyeno ke kewtî vengî. Xoresnayîşê edaletî sey suc yeno dîyîş. Waştişê dayîka Emîne Şenyaşare sey suc yeno dîyîş. No zî esasê edaletî qels keno. AKP wexto ke ame îqtîdarî vat ke do vera feqîrî, bêusûslî û qedexeyan de têkoşîn bikero. La ewro ma ewnîyenê kişta înan de xeylê babetê ke ganî têkoşîn vera ci de bêro dayîş estê.”