COLEMÊRG - Nehabat Kayaya ke yew aşmî yo tu xeberêk kênaya xo Meryeme ra nêgîna, seba paştîdayîşî venga rayaumûmî û dezgehê cinîyan kerd.

 

Nebahat Kaya dadîya Meryeme ya û demêk dergo ke peynîya aqûbetê kênaya xo de kewta. Nehabata ke yew aşmî yo tu xeberêk kênaya xo ra nêgêna, seba paştîdayîşî venga rayaumûmî, parlamenter û dezgehanê cinîyan kerd. 

 

Nebahate ajansê ma rê wina qalê qewimîyayîşê kênaya xo kerd.

 

Nebahate da zanayîş ke Meryeme Colemêrg de mektebê mîyanenî yê meslekî yê kênayan de wendêne û wina qala rewşe kerd: “Kênaya mi a roje telefon de mi rê vat ke ‘Ez V.A.I reyde şina’. Telefon girewt û êdî ez nêeşkaya xo biresna aye. Mudirê mektebî şewe saet 9î de telefon akerd û persê kênaya mi kerd. Goreyê mi uca de îhmalkarîyêk esto û eke hîna lez malumat bidîyayêne mi beno ke mi xo biresnayêne kênaya xo. Mi keyeyê ê camêrdî zanayêne û ez do bişîyayêne keyeyê ci û mi bivatêne kênaya mi bîyare. Mi rê vatî ‘Ti tewrê ci mebe, ti cinî ya, şo keyeyê xo’. Mi înan rê vat ke kênaya mi hema tutêke 17 serrî ya û şina mekteb.”

 

'Ez şîya qereqol, dozgerî û mudirîya perwerdeyî ya netewî' 

 

Nebahate wina bale ant serê nizdîbîyayîşê xo seba kênaya xo û vat: “Mi çend hewl da zî mi xo nêresna kênaya xo. Ez şîya kişta mudirê perwerdeyî yê netewî. Mudir herinda ke hetkarîya mi bikero, keyeyê V.A.Iyî pîroz kerd û keye rê vat ke ‘Ha dadîya kênaye kişta mi de ya’. Seba  ke mudir nizdîbîyayîşêk winasî mojna kênaya mi destê înan de ya. Ez şîya dozgerîye, qereqol, mekteb û mudirîya perwerdeyî ya netewî la çîyêk nêame kerdiş.”

 

Stargehê cinîyan de yena bicakerdiş

 

Dayîka Meryeme Nebalate, dîyar kerd ke wextê ke xebere ci ra nêgîna tersena û wina vat: "Seba ke tu xebere ci ra çinbî, ma xo resna camêrdo ke kênaya mi remnayo û tenê verdayî ez reyke ci dir qisey bikerî. Mi fam kerd ke rewşa kênaya mi baş nîya û tersena qisey bikera. Dima ra nêverdayî ke ez kênaya xo reyde qisey bikerî. Kênaya mi bi mehrê dînî bi zorî ameye xewicnayîş. Seba kênaya mi veyvêke organîze kerdî û mi zî telefon emnîyetî rê akerd. Polîsan şî eşt serê veyve la reyna kênaya mi nêardî. Dimayê wextêk mi waşt ez şêrî kênaya xo bivînî la mi ra vatî şîya Bûrsa. Kênaya mi remnayî. Kênaya mi firsetêk vînena û wexto yena otogar uca de V.A.I vernîya ci gêno. O wext Meryeme venga polîsan kena. Polîsî Meryeme benê stargehê cinîyan ê Bûrsayî bi ca kenê. Uca de mi rê telefon kerd û qalê remayîşê xo kerd. Ma verê xo da Bûrsa, la kênaya mi nêwaşt ma bivîno."

 

Venga hetkarî kerd

 

Nebahate, da zanayîş ke dima ra agêrayê Gever, la êdî tu agahî ci ra nêgirewtê û wina vat: "Seba ke nasê V.A.I stargeh de estbî, agahîya înan Meryeme ra bîne. ênaya mi wexto ke bî 18 serrî stargeh ra vejîya û mudurê stargehî venga V.A.I kerd. Kênaya mi wextê vejîya ameye remnayîş. Ma nêzanê kênaya mi kiştê, dayê kesêk bîn. Mi muracatê qereqole û emnîyetî kerd la çîyêk nêkerdî. Çîyêk bêro sereyê kênaya mi berpirsîyar ê yê. Çiqas tehdît kenê wa bikerê ez o persê aqûbetê kênaya xo bikera."

 

Nebahate tewr peyîn venga rayaumumî kerd, parlamenter û sazgehê cinîyan kerd û hetkarî waşt: "Bi aşmêke yo ez kênaya xo ra agahî nêgîna. Kesê wayîrê bi wijdan goş bidê mi û hetkarîya mi bikerê. Ez êdî nêeşkena xo ver bidî."