Mîdye Miqted

 

HELEB - Taxa Şêxmeqsûd de pêşengehêke hetê Meclîsê Weşîye yê Kongra Star û Yewîya Cinîyanê Êzidîyan ra amebî akerdiş. Cinîyan derheqê na pêşangeha ke seba pawitişê kultur û hunerî ameye akerdiş, wina vatî: "Ma sey cinîyê Taxa Şêxmeqsûdî, fek xoza, adetî û kulturê xo ra vera nêdanê. Ma do têkoşîn bikerê heta ke ma nêverdê kulturê ma bêro qirkerdiş.”

 

Taxa Şêxmeqsûdî de pêşengehêke hetê Meclîsê Weşîye yê Kongra Star û Yewîya Cinîyanê Êzidîyan ra amebî akerdiş. Na pêşengehe de hacetê kanî û bi destan yê ke cinîyan awan kerdê, eynî wextî de dermanê xozayî estbî. Cinîyê Helebî derheqê babete de ercnayîş kerdî. Cinîyan ercnayîşê xo de bale antî serê girîngî û pawitişê kultur, huner û xozaye. 

 

'Ma waşt ke ma cigêrayîşêk seba kulturê xo bidê viraştiş’ 

 

Endama Koordînasyonê Cinîyê Êzidî ya Rojawanî ya Ofîsê Helebî Newroz Edoye dîyar kerd ke înan waştî ke cigêrayîşêk seba kulturê xo bidê destpêkerdiş û wina vat: “Ma pêşangehe xo bi amacê asîyayîşê kulturê xo akerd. Nê semedî ra demê peyênan de zafaneyê keyeyê ma verê xo danê ver bi koçberîye. Coka ra zî ma waşt ke ma cigêrayîşêk seba kulturê xo bidê viraştiş ke her kes agêro tarîxê xo û kulturê xo. Ganî her kes agêro bajarê xo û terk nêkero.”

 

'Ma bi hêvî yê, wa kesêk verê xo nêdo koçberîye’

 

Peynîya qiseykerdişê xo de Newroze wina waştişê xo ard ziwan û vat: “Ma bi hêvîyî ke şarê ma verê xo bi koçberîye nêdo û xo bi tarîx, kultur û hunerê xo girê bido. Wa bipawî ke helînayîş û qirkerdişî ra derbaz nêbê.”

 

'Cinî perçeyêk xozaye ya' 

 

Rayîrberîya Meclîsê Weşîye ya Kongra Starî Şîraz Silêman bale ant serê cinî û xozaye ser û wina vat: “Na pêşangeha ke ma akerd girêdayeyê kulturê cinîye ya. Eynî wext de zî heme çîyê xozaye tede ameyî pêşkêşkerdiş. Seba ke cinî perçeyêk xozaye ya û yewbînan ra nîna birnayîş.” 

 

Qirkerdişê xoza û kulturî 

 

Şîraze qiseykerdişê xo yê peyênan de dîyar kerd ke dermanê xozaye yê ke pêşangehe de ameyî pêşkêşkerdiş bi hawayêkê xozayî ameyî viraştiş û vat: “Amacê ma yê akerdişê pêşangehe no yo ke şar xozaya xo nas bikero û xo xozaya xo ra dûrî nêkero. Çîyo tewr muhîm zî ma dermanê xozayî bi destan virazenê û seba ke şarê ma xo madeyê tîryak û kîmyewîye ra bido fînayîş. Ganî roja ma ya ewro de zaf kesî karê xo bikerê ke xozaya ma û kulturê ma qir nêbo. Ma sey cinîyê Taxa Şêxmeqsûdî fek xoza, adet û kulturê xo ra nêverdenê. Ma do têkoşîn bikerê û nêverdê ke kulturê ma bêro qirkerdiş. Ganî her kes wayîrê kulturê xo bivejîyo.”