Elfazî Toral

 

STENBOL - Rayîrberîya MATUHAYDERî Sebat Karule da zanayîş ke 30 aşmî yo tu xeberêke Rayberê PKKyî Abdullah Ocalanî ra nîna girewtiş û vat ke vatişêk Abdullah Ocalanî seba şaran do çareserî bîyaro û wina vat: “Heta ke tecrîdê Îmraliyî nêwedarîyo, heta ke tecrîd nêro şikitiş çareserî mumkun nîyo. Eke ma biwazê azadî û aramîye bêrê nê welatî, ganî tecrîdê serê Birêz Ocalanî bêro şikitiş. Ez venga têkoşînê topyekunî bi heme kesî kena.” 

 

Rayberê PKKyî Abdullah Ocalan 24 serrî yo Îmraliyî de binê tecrîdê giran de yo û 30 aşmî yo tu xeberêke ci ra nîna girewtiş. Muracatê keye û avûkatan ke bi amacê pêvînayîşî yenê kerdiş, yenê redkerdiş û ne cewabêk pozîtîf ne zî cewabêk negatîf nîno dayîş. Tecrîdê Îmraliyî tesîr bi heme hetê komelî ser de zî kerdo. Zîndanan de zî tesîrê tecrîdî her hetî ra yeno hîskerdiş. Nimuneyê peynî zîndanê Tîpê Lyî yê Erzîncanî de ame dîyîş. Tepişteyo nêweş ê giran Şakîr Turano 70 serrî ke nêweşxane de ameyêne dermankerdiş dinyaya xo bedilnabî. 

 

Heto bîn de seba ke tecrîdê Îmraliyî bêro şikitiş şar têkoşînê xo de qerardar o. Rayîrberîya Komeleya Paştîdayîş û Hetkarîya Keyeyê Tepişteyan ê Marmaraye ra (MATUHAYDER) Sebat Karule derheqê tecrîdê Îmrali û tesîrê ci yê zîndanan de qisey kerd. 

 

Waştişê tepişteyan no yo ke xo biresnê heqê weşîye 

 

Sebate da zanayîş zîndanan de bi serran o binpaykerdişê heqan yeno ciwîyayîş û prosesê peynî de no resa merheleyêk tewr cor û wina vat: “Vera nê polîtîkayan de rayraberdişê têkoşînî wezîfeyêk merdimîye yo. Seba nê çîyî ferz nîyo ke merdim wayîrê nasname yan zî îdeolojîyêk bibo. Zîndanan de xeylê binpaykerdişê heqan esto. Ganî merdim tena hetêk ra nêewnîyo. Heto bîn de zî serranê peyênan de xeylê cenazeyî zîndanan ra vejîyayî. Tewr peynî zîndanê Tîpê Lyî yê Erzîncanî de tepişteyo binameyê Şakîr Turanî yê 70 serrî nêweşxane de dinyaya xo bedilnabî. Ganî merdim biewnîyo înfazê ke yenê veşênayîş. No merdim nêweş bî û înfazê ci ameybî taloqkerdiş. Tepişte nêeşkenê xo biresnê heqê weşîye. Keyeyî na babet de waştişan kenê û bi no hawa raştî vejîyena raşte.” 

 

Seba şikitişê tecrîdî têkoşînê topyekun 

 

Sebate ard ziwan ke eke dezgehê komelê sivîl û pawitoxê heqê merdiman reaksîyon bimojnê binpaykerdişê heqan yê zîndanan do netîce bigîrê û vat ke problem do bi têkoşînê yewbîyaye bêro çareserkerdiş. Sebate qiseykerdişê xo wina dewam kerd: “No binpaykerdiş girêdayeyê tecrîdê Îmraliyî yo. Tecrîdê serê birêz Ocalanî heme zîndanan û şarî de tesîr viraşto. Vera polîtîkayê tecrîdî de têkoşînêk topyekun ferz o.”

 

‘Wazenê şarê kurdî rayberê înan ra dûrî bikerê’

 

Sebate dewamê qiseykerdişê xo de vat: “Prosesê çareserîye de yew vatişê Abdullah Ocalanî do çareserîye bîyaro. No zî goreyê hesabê dewlete nîyo. Eke ma biwazê asayîş bêro nê welatî ganî tecrîdê serê Abdullah Ocalanî bêro wedaritiş. No heqêq gerdunî yo. Tîya de dişmenîyêk gird vera kurdan de esto. Wazenê şarê kurdî rayberîye ra dûrî bifînî.” 

 

Şarê kurdî gamêk tepîya nêeşt... 

 

Sebate tewr peynî vat ke pereyo ke şerî rê yeno xerckerdiş, ganî seba weşîye bêro xerckerdiş û wina peynî kerd: “Dewlete bi polîtîkayê şerî, bi binpaykerdişê heqan yê zîndanan wazena şarî ceza bikera. Mumkun nîyo ke merdim qala huqûqî bikero. No huqûqê dişmenîye yo. Ganî heme merdimîye seba tepişteyan têkoşîn bikero. Ganî seba tepişteyê nêweşî têkoşîn bêro girdkerdiş. Şarê kurdî vera hende hêrişan gam nêeşto û do nêerzo zî. Ez venga têkoşînî bi heme kesî kena. Ganî pawitoxê heqan têkoşîn gird bikerê.”