AMED - Taximê Futbolî yê Cinîyan ê Amedsporî îdmanê xo yê sezonê neweyî dewam keno. Kaybazê taximî venga girdkerdişê paştîdayîşî kerdî û wina vatî: "Heta ke şar paştîdayîş bido ma do bibê." 

 

Her tim hêrişê nîjaperestî bi Amedsporî yeno kerdiş û vera nê û vera heme astengîyan de xebatê xo domnenê. Xebatê Taximê Futbolî yê Cinîyan ê Amedsporî yê seba sezonê neweyî, dewam kenê. Zextê siyasî û malî bi kulubê Amedsporî yenê kerdiş û hewl yeno dayîş ke bêro girewtiş. Cinîyê ke têkoşînê xo domnenê û paştîdayîşê şarî gênê Tesîsê Sporî yê Şehmus Ozerî de xebatê xo dewam kenê. 

 

Ma cinîyê Taximê Futbolî yê Cinîyan ê Amedsporî rê persa xebatanê înan kerd.

 

'Vera cinîyan de verhukmêk esto’ 

 

Kaptana taximî Hatice Merve Çavure dîyar kerd ke no 4 serrî yo taxim de ca gêna û vat: "Ma seba sezonê neweyî xebatanê neweyî da destpêkerdinş. Reya yewine emserr seba ma tesîsêk ame cîyakerdiş. Ma sereye sezonî de des bi cotantremanan kerd. Wina dewam kerd. Hewteyo verên bi Antalya Sporî reyde maçê ma estbî. Bi hawayêkê têduştî netîce bî. Ma nika ra tepîya bi antremanêk rayîrê xo dewam kenê. Na cografyaya ke ma ser de ciwîyenê, vera cinîyan de verhukmêk esto. Vanê 'cinî nêeşkena futbol kay bikera’. La ma ewnîyenê ke ma no fikrî serra verêne çinî kerd. Yanî bi temamî ma serra emserrî baş derbaz kerd.”

 

'Ma do pîya ser bikewî' 

 

Amedspor muhîmî dano esasî. Dimayê weçîniteyan sporwanê jîyatî tewrê ma benê. Serkewtişê ma vera keyeyê ke kênayan xo şirawenê kişta ma yo. Nizdîbîyayîşêk cîyaker hemverê taximê ma de esto. Taximê rojawanî herêma ke ma tede ciwîyenê vera nêwazenê ma ser bikewê. Wazenê kulub bêro girewtiş. Ma nê çîyan heq nêkenê. Wexto ke taximê binî yenê tîya heta ke destê ma ra bêro ma meymanperwer ê. La heta ke ê wayîrê nê fikrî bibê ma se bikerê zî veng o. Ma paştîdayîş şarê Amedî ra pawenê. Çike ma do pîya ser bikewê.” 

 

'Prosesêk zehmetin ra ma ameyî heta tîya’ 

 

Şevîn Yaruka ke Amedsporî 3 serrî yo kay kena wina vat: “No yew aşmî yo ke ma dest bi antremanan kerdo û ma bêmaben dewam kenê. Prosesêk zehmetin ra ma ameyî heta tîya. Problemê cayî estbî, taximê cinîyan ya otel ya zî cayêk bîn ê ke ameybî eyarkerdiş de mendêne. Nika ma tesîso ke seba ma ameyo eyarkerdiş de manenê. Tîya de ma werdê xo wenê, antremanê xo kenê û raşteyê ma yê hobîyê taybet esto. Verê cû problemê ma hîna zêde bî. Çike nê çîyê ke ma hûmartî ra yew zî çinî bî.”

 

‘Ma goşê xo padanê û kayê xo dewam kenê’ 

 

Şevîne da zanayîş ke deplasmanan de ê zextêk zêde hîs kenê û wina dewam kerd: “Ewnîyayîşê taximî vera ma de cîya yo, coka ra vatişan ma ra kenê û no tesîrêk negatîf ma ser de keno. Ma goşê xo padanê û kayê xo dewam kenê. Seba ke no çî bibedelîyo ma xover danê la zext zêde yo. Şarê Tirkîya ma ra hes nêkeno, ê ma nêwazenê la şarê Kurdistanî ma ra hes keno. Ma nê çîyî hîs kenê. Her maçî de, antreman de yenê paştîdayîş danê ma.”

 

'Heta ke şar paştîdayîş bido ma ma estê’ 

 

Tewr peynî cinîyan ra Şevîne dîyar kerd ke aye wazena şarê Amedî nê prosesî de kişta înan de bo û wina vat: “Wa şarê Amedî paştîdayîşê xo seba ma dewam bikero. Heta ke şar paştîdayîşê xo bido ma ma estê. Ê paştîdayîş bidê ma ma do hîna bi hêz bibê û ma do aver şêrê.”