Elfazî Toral

 

KOCAELÎ - Zeytin Saticiya ke badê 7 serran Zîndanê Kandiraye ra ameye tehlîyekerdiş wina vat:"Têkoşînê zîndanî vindertişê cinîya kurde yo! Zîndan de ma cinî îrade awan kenê. Zîndan tena azadîya ma ya fîzîkî asteng keno. La nêeşkenê fikir û rêxistinbîyayîşê ma hepis bikero. Ma cinîyan zîndan açarnayo cayê îradeyî.” 

 

Zeytin Saticiye serra 1981î de Dewa Katûne ya Şemzînanî ya Colemêrgî de dayîke ra bena. Serra 2017î de Mêrdîn de yena destbendkerdiş û dima ra yena tepiştiş. Bi îdîayê ‘xeripnayîşê yewîya dewlete’ û ‘endamtîya rêxistine’ ra 7 serrî ceza aye rê yena birnayîş. Zeytina ke Mêrdîn de yena destbendkerdiş surgunê 1ine Zîndanê Kandiraye yê Kocaelîyî yena kerdiş. Zeytina ke no 7 serrî yo tepişte ya, ganî 6 aşmî verê cû biameyêne tehlîyekerdiş la raporê Ciewnayîşê Çimdarî û Îradeyî sey bahane ameyî mojnayîş û înfazê aye ame taloqkerdiş. Zeytina 42 serre bi heyecan û sereberzîya xo ya ke feyzî dana cinîyan vizêr Zîndanê Kocaelîyî ra ameye tehlîyekerdiş. Zeytina hetê embazanê xo yê cinîyan ra bi sloganê ‘Jin Jiyan Azadî’ ameye oxirkerdiş û hetê keye, rêxistinê komelkî yê sivîlî ra bi çepikan ameye pêşwazîkerdiş. 

 

Zeytina ke rêxistinbîyayîşê xo yê vera polîtîkayê tecrîdî her tim gird kerd û raşteyê zîndanî bi felsefeya xo ya cuye açarna têkoşînî hîssê xo JINNEWSî rê pare kerd. 

 

Zîndan açarna raşteyê têkoşînî 

 

Zeytine da zanayîş ke vera heme polîtîkayê tecrîdî de serewedarnayîş bi destê cinîyan ameyo ristiş û wina dewam kerd: “Manaya zîndanî seba kesan û komelî îrade ya. Ganî ma nê esasî ser de zîndanan bigêrî dest. Kesê ke zîndanan de tepişteyê wayîrê îrade yê. Her çend ke bêro waştiş ke kesê zîndanan komelî ra bêrî dûrîfînayîş zî ma bi têkoşînê xo zîndan açarna raşteyê cuye. Çike ma manaya yewî û têkoşînî bi cuye bar kenê. Zîndan îradeyêk senî ganî hemverê sîstemî de bivejîyo aver mojneno ma.” 

 

'Rêxistinê ma îradeyê me ya' 

 

Zeytine bale ant serê têkoşîn û îradeyê cinîyê tepişte û wina vat:"Ma serewedarnayîşê zîndanan û îradeyê cinîyê tepişteyî anê verê çimanê xo û dima ra nizdî benê. Sîstem hêrişê cinîya wayîrê bi îrade keno û înan keno zîndan. La cinî zîndanan de têkoşînê xo gird kena û vejîyena. Uca de rihê girêdayîşê cinîyan ê yewbînan reyde vejîyeno raşte. Gird beno. Têkoşînê zîndanî vindertişê cinîya kurde yo! Zîndan de ma îrade awan kenê. Zîndan tena azadîya ma ya fîzîkî asteng keno. La nêeşkeno fikir û rêxistinbîyayîşê ma heps bikero. Ma cinîyan zîndan açarnayo cayê îradeyî.” 

 

Cinîyan ra hêz gênê û serewedarnayîş honenê

 

Zeytine da zanayîş ke seba înan zîndan wextêk bi heyecan û kêfweş derbaz bîyo û dewam kerd: “Ma welê xo ra newera benê. Zîndan de caardişê seba çinîkerdişê îradeyî dewre de yê. La ma hemverê nê caardişan de vejîyayî û serewedarnayîş timî honenê. Heto bîn de zî wexto ke ez vejîyena hîssin bena. Çike ez embazanê xo ra dûrî bena. Embazê mi yê têkoşînî uca de yê. Bi hawayêkê zehmet derbaz bî la ma pîya têkoşîn da. Çike wexto ke îradeyê kesan çinî bo nêeşkenê zîndanan de bimanê. Ma nê îradeyî pawenê."

 

'Do têkoşînê ma daîmî bibo’ 

 

 Zeytine ard ziwan ke hetê înan ê bi cesaret û girêdayîşê înan, înan keno wayîrê îradeyî û vat: “Ma bi nê rihî û nê serewedarnayî zîndan ra vejîyenê. No îrade û rih seba komelî zî serkêşîyek o. Zîndan de qet bawerîya ma çinî bênê. Eksê ci bawerîya ma hîna zêde bî. Do têkoşînê ma daîmî bibo. Têkoşîn bi heskerdiş, bawerî û îradeyî gird beno." 

 

Têkoşînê zîndanî vindertişê cinîya kurde yo! 

 

Zeytine qiseykerdişê xo yê peyênan de dîyar kerd ke bawerîya cinîyanê tepişteyan esta û wina domna: “Felsefeya ma ya cuye esta. Wexto ke ma bi na felsefeye têbigêrê ma do cuye û bawerîye bi serewedarnayîş gird bikerê. Têkoşînê zîndanî vindertişê cinîya kurde yo!"