MERKEZÊ XEBERAN - Aktivîste Bahareh Hedayat a ke wextê serewedaritişê Îran û Rojhelatê Kurdistanî de amebî tepiştiş, bi vatişê “Seba Îrano ke nêzdîyê azadîye yo wa bibo paştdayîşêk qij” neql kerd ke aye dest bi grevê vêşanîye kerda.

 

Bi nêzdîbîyayîşê serrgêra serewedaritişê ke Îran û Rojhelatê Kurdistanî de dest pêkerdo, şarê ke bi sloganê “Jin jiyan azadî” vejîyayo kuçeyan, bi qerar o heta netîce bêro girewtiş têkoşînê xo dewam bikero. Hukmatê Îranî zî seba serewedaritişê bitepisnê polîtîkayê tepiştiş û zextî dewam keno. Aktîvîst û xoverdayoxê ke serewedaritişî de ameyê tepiştiş zî zîndan açarnayê cayê xoverdayîşî.

 

Bahareh Hedayat a ke Zîndanê Evîne ke 3ye Teşrîna Verêne 2022yîne ra tepişte ya û verê zî xeylêk reyan amebî tepiştiş, bi mektûbêke dîyar kerd ke seba rojnamegeranê tepişteyan Nîlufer Hamedî û Elaha Mohammadî yê dimayê serewedaritişê 16ê êlule 2022yîne ameyî tepiştiş û ceza înan rê ameye birnayîş û Cewad Ruhîyo ke zîndan de dinyaya xo bedelnaye, 31ê Tebaxe de dest bi grevê vêşanîye kerda.

 

‘Na herre êdî zulm qebûl nêkena’

 

Bahareh Hedayat mektûbe xo de bale ant serê rojnamegerê ke ameyê tepiştiş û cezaya giran înan rê ameya birnayîş, aktivîstê karker û wendekarî û dîyar kerd ke çîyê ke dadgehan de yenê muhakemekerdiş,  wijdanê kolektîf ê şarî yê. Bahareh Hedayat da zanayîş ke hewl danê nameyê Jîna Emînî vîr û wijdanê merdiman ra wedarnê û mektûba xo wina peynî kerd: “Tîya de, pey dêsanê Zîndanê Evîne de zûrê ke îqtîdar keno û hewl dano normal bimojno ma bi çimanê xo vînenê. Grevê vêşanîye ke mi seba paştdayîşê cinîyê azadîwaştox û xoverdayoxan ê welatê xo dayê destpêkerdiş; wa seba Îrano ke nêzdîyê azadîye yo bibo paştdayîşêk qij, na herre êdî zilm qebûl nêkena.”