Mîdye Miqted

 

HELEB - Endama MSDyî ya Taxa Şêxmeqsûdî, Zeyneb Qember derheqê rewşa Efrînî ya dimayê ame îşxalkerdiş de dîyar kerd kerdişê bêmerdimayî dewam kenê û wina vat: "Hedîseyê ewro Efrîn de qewimyenê ne kerdişê normal ê. Ganî verê çiman ra nêşêro. Çike dewleta tirke û çeteyê ke ci rê girêdayeyê, wazenê cinîyan bikişê û îradeyê înan bişikinê. Bi têkoşîn û yewîya cinîyan ma do zorê îşxalî berê."

 

Dimayê ke dewleta tirke û komê girêdayeyê ci Efrînî kerd binê kontrolê xo, binpaykerdişê heqê merdiman her ke şî zêde bî. Her roje komê girêdayeyê dewleta tirke yê tecawuzê cinî û tutan kenê, înan kişenê, tepişnenê û fîdye wazenê. Xozaya Efrînî zî talan kenê. Welatijê Helebî eynî wextî de binê ablûqakerdişê hukmatê Şamî de yê. Endama Meclîsê Sûrîyeya Demokratîk (MSD) a taxa Şêxmeqsûdî, Zeyneb Qember derheqê babete de ercnayîş kerd.

 

'Kerdişê merdimayî ra dûrî Efrîn de dewam kenê'

 

Endama Meclîsê Sûrîyeya Demokratîk (MSD) a taxa Şêxmeqsûdî, Zeyneb Qember derheqê rewşa Efrînî ya dimayê ame îşxalkerdiş nê ercnayîşî kerd: "Şerê ke bajarê Efrînî ame destpêkerdiş 58 rojan dewam kerd û hemverê nê îşxalkerdişî de xoverdayîşêk zaf pîl ame dayîş. Dimayê ke Efrîn 2018ine de ame îşxalkerdiş, kerdiş û binpaykerdişê heqan dewleta tirke xeylêk zêde bî. Heta roja ewro çeteyê uca tecawuzê cinî û tutan kenê, desteştişê înan kenê, xoza talan kenê."

 

'Dewleta tirke wazena împaratorîyê Osmanî peyser bîyara'

 

Zeynebe dîyar kerd ke dewleta tirke wazena împaratorîyê Osmanî peyser bîyara û wina vat: "Bi 5 serrî yo ke bajarê Efrînî destê dewleta tirke û çeteyê ci de yo la heta roja ma ya ewro dewleta tirke û çeteyê ci fek lêşînîyê xo ra vera nêdayî û verê ra zêdeyêr zirar dayî welatijan ro, mal û milkê înan ro. Dewleta tirke rayîrê nê kerdişan de wazena reyke bîn Împaratorîyê xo yê Osmanî awan bikero û bi rayîrê nê de pêro erd û bajaran bikero mîyanê cografyayêke girêdayê xo. No zî yeno waştiş bi rayîrê çeteyanê xo bikero."

 

'Ganî ma babeta Efrînî verê çiman de bigîrê'

 

Zeynebe da zanayîş ke eke bajarê Efrînî nêro xeliskerdiş do problemê Sûrîye safî nêbê û wina vat: "Wexto ke biwazê alozî û problemê Sûrîye safî bikerê, ganî ma babeta Efrînî verê çiman de bigîrê. Dewleta tirke eynî wextî de bi hêrişê serê adetê  Efrînî û rijnayîşê înan waşt her ca de no bikero binê îqtîdarê xo. Wazena erdê welatijê Efrînî destê înan ra bigîro."

 

'Ganî nê sazgeh û rêxistinî bi wijdanê xo kar bikerê'

 

Zeynebe dîyar kerd ke ganî dewletê mîyanneteweyî bi wezîfeyê xo wurzê û wina vat: "Nê pêro sazgeh û rêxistinê ke seba heqê cinî û tutan veng danê, heta nika hemverê kiştiş, remnayîşê cinîyan û tecawizkerdişê tutan bêveng mendê. Bi xusuî seba cinîyê efrînijî yê ke xeylêk rey para xo dej ra gênê, ganî ê sazgeh û rêxistinî bi wijdanê xo kar bikerê. Seba ke hedîseyê ke ewro Efrîn de qewimyenê kerdişê normal nîyê. Ganî verê çiman de no nêşêro. Çike dewleta tirke û çeteyê ke ci rê girêdayeyê, wazena her het ra cinîyan bikişa û îradeyê înan bişikno."

 

'Do her têkoşîn û xoverdayîşê ma dewam bikero'

 

Zeynebe tewr peyîn wina vat: "Ma do bi rayîrê cinîyê ke ewro bi rêxistin û têkoşînê xo seba temamê cinîyê dinya bîyê nimûne û pêro raşteyê sîyasî, leşkerî û kulturî de ca girewtê, têkoşînê xo bidê dewamkerdiş. Ma do hewl bidê ke seba problemê temamê cinîyanê dinya bibê çareyêke. Seba ke eke para cinî çareserîya problemê Sûrîye de çinî bo, ê problemê bi serran o rî dayo, do çareser nêbê. Ma Sûrîyeyêke merkezî wazenê.Ma wazenê layiqê keda ke ameya dayîş bê. Do her têkoşîn û xoverdayîşê ma dewam bikero."