AMED - Dayîka tepişteyê nêweşî Fatma Kaydû seba tepişteyanê nêweşan û înfazê înan yeno veşnayîş rê wina vat: “Nêweşê giranî nînê veradayîş. Sey lajê mi bi hezaran estê. Xora zîndanê Tirkîya de tewr zêde kurmancî estê.”

 

Kurdistan û Tirkîya de zîndanan  de polîtîkaya tecrîdî yena rayraberdiş. Tecrîdo ke serê Rayberê PKKyî Abdullah Ocalan de yeno rayraberdiş, zîndanan de zî roj bi roje vila beno. Sewbîna tepişteyê nêweşî nînê veradayîş û înfazê înan zî yeno veşnayîş. Goreyê dayeyê Komeleya Heqê Merdiman (ÎHD) hezar û 517 tepişteyê nêweşî estê ke 651 ci ra nêweşê giran ê.  Fatma Kaydû zî sey dayîkêke tepişteyê nêweşî derheqê polîtîkayê tecrîdî yê zîndanî de yeno rayraberdiş de ercnayîş kerd.

 

Wexto ke tut bi ame tepiştiş

 

Fatma Kaydû destpêkê qiseykerdişê xo de qalê tepiştişê lajê xo yê Bekir Kaydû kerd û vat, aşma çeleyê 2010ine de ameyo tepiştiş û 16 serrî ceza ci rê ameya birnayîş. Fatma dîyar kerd wexto ke ameyo tepiştiş, hema 17 serre bîyo û bi 14 serrî yo zî tepişte yo. Fatme dîyar kerd ke lajê aye xeylêk rey ameyo surgunkerdiş û wina vat: “Sere de Zîndanê Amedî de bi, dima ra ey berdî Zîndanê Edirneyî, dimayê Edirneyî berdî Zîndanê Bandirmayî û Bandirma ra zî berdî Zîndanê Mereşî. Tewr peyîn erdlerz virazîya, ey berdî Antalya. Rayîr dûr o û ma xeylêk zehmetî ancenê. Wexto ke Amed de bi, ez bi rehetî şîne û ameyîne. Nika şina, rayîr rojêke anceno. Ez şewêke zî uca de manena. Roja bîn agêrena, semedo ke rayîr dûr o. Înfazê ey 3 serrî, 7 aşmî ame veşnayîş û  gurçikanê xo ra nêweş o. Vernîya aşmêke gurçikanê xo ra emelîyat bi û gurçikanê ey de kerra esta. Seba fitiqî zî emelîyat bi.”

 

‘Kurmancî zîndanan de bê suc û sebeb yenê tepiştiş’

 

Fatma sey dayîkêke tepişteyê nêweşî bale ant serê bêhuqûqîyê serê tepişteyanê nêweşan û înfazê înan yeno veşnayîş û dîyar kerd ke bi sebebê veng, ceza yena dayîş û tepiştiş beno. Fatma wina dewam kerd: “Nêweşê giranî nînê veradayîş. Seke lajê mi bi hezaran estê. Xora zîndananê Tirkîya de tewr zêde kurmancî estê. Tu kesî zî çîyêk nêkerdo, bê suc û sebeb zîndan de yê.”

 

‘Her kes bi tehlukeyê zîndanî reyde rî bi rî maneno’

 

Fatma dîyar kerd ke şar bi polîtîkaya bêvengverdayîşî reyde rî bi rî maneno û dîyar kerd ke şar biwazo veng vejo, ê zî bi tehlukeyê zîndanî reyde rî bi rî manenê. Fatma wina vatişê xo qedêna: “ Ganî her kes wurzo serê lingan. Ganî bêvengî nêvirazîyo. Wexto ke kurmancî pêro wurzê serê lingan, no çî nîno kerdiş.”