ŞIRNEX - Şirnex de tuto ke wesayîtê zirxî da piro, beşê ewnîyayîşê giranî de yeno tedawîkerdiş û ame zanîyîş ke travmayê sereyî derbaz kerdo. 

 

30ê Tebaxe de merkezê Şirnexî de wesayîtê zirxî tutêk 12 serre yo bi nameyê Tajdîn Adalî rê da piro. Tajdînî wedarnayî Nêweşxaneyê Dewlete yê Şirnexî. Pêwa giranbîyayîşê rewşa Tajdînî ey wedarnayî nêweşxaneyêk taybet ê Êlihî. 

 

Goreyê agahîyê ke doktorê Tajdînî da; Tajdîn travmayê sereyî derbaz kerdo û nika nêweşxaneyî de beşê giranî de yeno dermankerdiş û rewşa ey ver bi başbîyayîşî şina.

 

Sewbîna balkêş o ke heta nika Walîyê Şirnexî derheqê babete de eşkerayîye nêdaya.