Rojda Aydin 

 

WAN - Cinîya bi nameyê Hurrîyet Tanyelî ya ke taxa Cevdetpaşa ya qezaya Rayîrê Armuşî de ronişena, dîyar kerd ke taxe de borîyê awe teqîyayî û awe herikîyena. Hurrîyete da zanayîş ke çend reyan VASKÎyî gêrayî la nêameyî problem çareser nêkerdî û reaksîyon mojna peygoşîya VASKîyî. 

 

Serra 2019î de bado ke qeyûm tayînê Şaredarîya Armuşî ya Wanî ame kerdiş, problemî zî xo reyde ard. Qeyûmo ke heta nika tu problemêk daxî çareser nêkerdo, nê probleman ra yew zî yê awe çareser nêkeno. Bajarê Wanî de kişta problemê awe ya pêroyî de taxa Cevdetpaşa ya Rayîrê Armuşî de borîyê awe yê keyeyê cinîya bi nameyê Hurrîyet Tanyelîye teqîya û her çend ke malumat dayî şaredarîye zî hema problemê înan nêameyo çareserkerdiş û awe herikîyena taxe. 

 

‘VASKÎ eleqedar nêbena’ 

 

Hurrîyete ard ziwan ke borîyê awe yê teberî de seba ke naylonî wexto ke wesayîr ser ra şino û yeno xeylê reyan teqîyenê û vat ke nika reyna teqîyayî. Hurrîyete dîyar kerd ke Îdareyê Awe û Serebî yê Wanî (VASK) problemê înan yê awe çareser nêkeno û wina vat: “Ma çend reyan şîyî VASKÎ ke bêrî eno borîyê awe virazî. La nêameyî. Mêrdeyê mi zî dimayê qezayêk ke derbaz kerd platîn kerdî çaqeyê ci û nêeşkeno virazo. Sewbîna îmkanê ma çinî yo ke ma venga kesêk bikerî ke bêro virazo. No wezîfeyê VASKÎyî yo. La o zî nîno. Ma çend reyan şîyî, ma rê vatî ke ‘ma do bêrî’, la hende wext derbaz bîyo hema zî nêameyo. Taxa ma de bazar yeno awankerdiş û awe ma ser de herikîyeno. Hem kesê bazarî û hem zî kesê ke taxe de ronişenê na reewşe ra acizin î. Ma çend reyan gêrayî, la nêameyî. Xora ma nêeşkenê îdareyê xo bikerî, ma do senî çareser bikerî. Eke îmkanê ma bibayêne ma do biviraştêne.”

 

‘Her tim na borî teqêna’ 

 

 

Hurriyete, dîyar kerd ke hewteyêk o boriya awe teqîyaya la heta nika tu kesêk nêameyo û wina vat: “Cîranî VASKÎ rê gêrayî. La nêameyî. Ma zî nêzanê ke çira nînê? Nê ra ma zî zirar vînenê. Sewbîna seba ke awe veng kuçe ra herekêna awa ma ya keyeyî zî xeylêk kêmî herêkêna. Ma nêeşkenê makîneyê xo abikerê. Seba nê ma fatûreya awe zî zêde danê. Ma aşme tewr tay 150 - 200 TL heqê awe danê. Ma zî nêzanê ke senîn bikerê. No karê şaredarîye yo, la karê xo nêkenê. Pêwa hewldayîşê ma nînê. Eke linga mêrdeyê mi de platîn çinbîne, o do bieşkayîne viraştêne. Sewbîna tu xebatkarêk ma zî çin o. Vernîya nê zî xeylêk reyan borîya ma ya awe teqîya. Bi 10 serrî yo ez ameya na taxe her wext borîya awe teqêna. O wext zî bi hetkarîya cîranan ma viraştibi. La seba ke wesayîtî ser ra derbaz benê, reyna teqîya. Şaredarî ganî borîyêk baş bîyara û nê problemî çareser bikera. Şaredarî hetkarîya kesê feqîran nêkena. Her serre borî teqêna.”

 

‘Ma qeyûmî ra razî nîyê’ 

 

Hurriyete, da zanayîş ke ê qeyûmî ra razî nîyê û vat ke probleman çareser nêkeno. Hurîyete wina qiseykerdişê xo qedêna: “Wa şaredarî ganî nê  problemî çareser bikera. Na awe veng herikêna kuçeyan. Taxa tewr feqîr na tax a, la hetkarîya ma nêkenê.”