Tepişteya nêweşe rê revîr ferz kenê û nêbenê nêweşxane 

 

 

Rozerîn Gultekîn 

 

STENBOL - Tepişteya nêweşe Saîme Afşîn ke cezaya muebeta giran û 48 serrî û 8 aşmî ceza ci rê ameya birnayîş, ‘dermankerdişê revîrê zîndanî’ ci rê yeno ferzkerdiş. Avûkatan muracatê DDByî kerd la bi serrêke yo cewab nîno dayîş. Saîme pêwa pêro polîtîkayê îşkence têkoşînê xo dewam kena. 

 

Tecrîdo giran ê serê Rayberê PKKyî Abdullah Ocalanî 24 serrî yo dewam keno û sewbîna bi 30 aşmî yo tu agahî ci ra nîna girewtiş. Tecrîdê Îmraliyî tesîr serê pêro zîndanan zî kerdo. Polîtîkayê dişminî hemverê tepişteyan de bi tecrîdî hîn zêde giran beno. Goreyê Komeleya Heqê Merdiman (ÎHD) 651 ci ra giran hezar û 517 tepişteyê nêweşî estê. Sewbîna înfazê tepişteyê nêweşan bi kêfî yeno veşnayîş, dermankerdişê înan yeno astengkerdiş. Goreyê dayeyê ÎHDî yew tepişteya nêweşe ke Zîndanê Marmarayî de manena Saîme Afşîn a. Saîme 8 serrî yo tepişte ya û pêwa nexweş a nîna dermankerdiş.

 

Cezaya muebetê giran dayî 

 

Saîme aşma Hezîrana 2015ine de wexto 19 serrî bî Gever de ameye tepiştiş û derheqê aye de bi îdiayê ‘xirakerdişê yewîya dewlete’, ‘qestî teşebuskerdişê kiştişî’, ‘’qestî hetkarîya kiştişî’, ‘ser de vînayîşê madeyê bi tehluke ’, ‘muxaleftê qanûnê 6136’ û sewbîna bi îfadeyê 22 şahidê nimiteyî ameye muhakemekerdiş. Roniştişê Yewin Dadgeha Cezaya Giran a Colemêrgî 8ê Teşrîna Verêne 2018ine de ame vînayîş de cezaya muebetê giran û 48 serrî û 8 aşmî ceza ci rê ameye birnayîş. 

 

Îşkence ra ver bi kursîya bi teker… 

 

Saîme prosesê tepiştişê xo de seba pêrodayîşêk de birîndar bîbî emeliyat bî û platîn kerdî çaqeyê aye. Dimayê ke ameye tepiştiş, di serran Zîndanê Tîpê M yê Wanî de tepişte mende û uca de xeylêk îşkence dî. Saîme serrêke mecbûr mende kursiya bi teker bi şuxulino. 

 

8 serran de 4 surgun 

 

Netîceyê îtîrazê keye û muracatê avûkatan de Saîmeye sewqê Zîndanê Ispartaye ameye kerdiş û ewja de yew serrî tepişte mend û dima ra surgunê zîndanê Cinîyan ê Yenîşehîrî yê Bursa ameye kerdiş. Saîmeya ke di serran Zîndanê Bursa de tepişte mend, serra 2020î de surgunê Zîndanê Tîpê Myî yê Gebzeye ameye kerdiş. Saîameye 3 serrî yo ke Zîndanê Cinîyan ê Gebzeye de qawişê di kesî de tepişteya. 

 

Dermankerdişê revîrî yeno ferzkerdiş 

 

Saîmeye platînê çaqeyê xo vera dermanan şixulnena û keye mecbur maneno ke dermanan û kelepulê ortopedîk bido. Her çend ke platîn çaqeyê aye de bibo zî kontrolê rutîn nîno kerdiş û bi însîyatîfê îdarekaranê zîndanî heta ke rewşêk derheqê cuya aye de çinî bo nêwedarîyena nêweşxane. Saîmeye tewr peynî yew serrî verê cû şîbî kontrolê doktor û wexto ke şina nêweşxane zî revîrê zîndanî aye rê yeno ferzkerdiş. Keye derheqê prosesî de JINNEWSî rê qisey kerd. 

 

Yewine çîyo ke fek ci ra nêverdena têkoşîn o

 

Saîmeye vera heme îşkence, şîdet û nêweşîye qet fek têkoşînê xo ra nêverdena û heto bîn de zî bi berardişanê xo têkoşînê cuye dana. Vera zilmî de berardişê xo dewam kena Birayê Saîmeye, Munîf Afşînî dîyar kerd Saîmeye dest bi nuştişê kitabî kerda û vat ke Saîmeye kesêk mutevazî û cigêrayox a, cipersayîş kena û zanaya û wina vat: “Saîmeye wazena ke vera hende kede de zilm vindero. Wazena babeta cinî û heqê merdiman de azadî û xeylê heqan de zilm vindero. Saîmeye neheqîyan qebul nêkena. Hende cezaya ke Saîme û tepişteyanê bînan rê ameya birnayîş teberê merdimîye de yo. Tirkîya de emrê cuye hema hema ma vajî ke 80î derbaz nêkeno. La cezaya ke yena dayîş sey daliqnayîşî ya. Yanî vanê ke wa tu hêvîya înan çinî bo. Nê roja de efu vejîya. Heme tecawuzkarî ci ra fêde girewt. La sîyasetmedarî fêde nêgirewt.” 

 

Muracat bêcewab manenê 

 

Tewr peynî hetê mehkemaye ra 17ê Çeleyê 2022yî de cezaya muebetê giran û 48 serr û 8 aşme Saîmeye rê ameye birnayîş û ameye tesdîqkerdiş. Tesdîqkerdişê cezaye 16ê Adara 2022yî de tebligê Saîmeye ameye kerdiş. Dimayê nê avûkatan muracatê DDByî kerd. La no yew serrî yo ke cewab DDByî ra yeno pawitiş.