AMED - Tepişteyo nêweş o 70 serrî Şakîr Turan rixmê nêweşîya xo vera nêdîya û nêweşxane de dinyaya xo bedilnaye. Mesajê peyîn ê Şakîrî wina bi: “Sereyê mi berz o, mi apey gamêke nêeşte.”

 

Seba tepişteyo nêweş Şakîr Turan ke Zîndanê Tîpê Lyê Erzînganî de ameyîne tepiştiş, teşhîsê kanserê qirike amebi dayîş û mîyanê 4 aşman de 23 kîloyan zeîf bî. Bi îdiayê “Hetkarîya rêxistine”, 6 serrî cezaya zîndanî Şakîro 70 serrî rê amebî birnayîş. Şakir, rixmo ke hewteyêk o nêweşxane de bîbî xebere nêdîyaye keyeyê ci. Lajê Şakirî Abdurrahman Turanî da zanayene ke tepişteyanê bînan xebere daya keyeyî û 25ê tebaxe de o şîyo nêweşxane.

 

Lajê Şakirî, Abdurrahman Turanî Ajansê Mezopotamyaye rê pare kerd ke destûr nêdîyayo ke o babîyê xo bivîno û doktoran zî agahîyêke nêdaye ci. Abdurrahmanî vat: “Muracatê avûkatan ser o mi 28ê tebaxe de babîyê xo dî. Wexto ke newe kewtbî zîndan, o 75 kîlo bîbî la wexto ke mi o dî, babîyê mi 40 kîlo bî. O nêeşkayêne qisey bikero û pê zorî qisey kerdêne. Nêverdayêne ke ma hetê babîyê xo de bimanê.”

 

‘Sereyê mi berz o’

 

Abdurrahmanî tewr peyîn qalê qiseykerdişê babîyê xo kerd û vat: “Babîyê mi bodrumê nêweşxaneyî de tepişîyayêne û 6-7 cendirmeyî serê ey de vindertêne. Mi waşt ez puncan bida ey ra la cendirmeyan nêverda. Babîyê mi yew bi yew ma ra xatir waşt û vat ‘Miqatê xo bê, yew bê. Sereyê mi berz o, mi apey gamêke nêeşte.’ ”

 

Cenazaya Şakirî do qezaya Stewrî ya Mêrdînî de bêra definkerdene.

 

Şubeyê Amedî yê OHDyî 28ê temmuze de seba ke Şakiro nêweş vera nêdîyabî, nêrazîbîyayîşê xo mojnabî.