RIHA - Avukata OHDyî Ayşe Şehrîban Demîrele derheqê tecrîdo giran ê serê Rayberê PKKyî Abdullah Ocalan û tesîrê tecrîdî yê heme hetan ser de qisey kerd û wina vat: “Heta ke muxalefetê komelî vera sîstemê tecrîdî de vengê xo berz nêkero do binpaykerdişê heqan zêde bibo. La qiseykerdişê tecrîdî do biverdo ke muracatê ma bireso netîceyêk.”

 

29 aşmî yo ke xebere Rayberê PKKyî Abdullah Ocalan û tepişteyê kişta ci Hamîlî Yildirim, Omer Hayrî Konar û Veysî Aktaşî ra nîna girewtiş. Her hetî de tecrîdo giran yeno protestokerdiş û azadîya fîzîkî ya Abdullah Ocalanî yena waştiş. Bi hezaran avûkatî heta nika seba pêvînayîşî muracat kerdî. Rayîrberîya Merkezê Pêroyî ya Komeleya Huqûqnasê Seba Azadîye (OHD) avûkat Ayşe Şehrîban Demîrele derheqê babete de qisey kerd û da zanayîş ke no bêhuqûqî do bi destfînayîşê vengî peynî bibo.

 

‘Îşkence û tecrîdo giran’ 

 

Şehrîbane da zanayîş ke tecrîd prosesêk 4 serran nîyo û 24 serrî yo tecrîd Îmraliyî de dewam keno. Şehrîbane dîyar kerd ke Tirkîya de heqê huqûqî, normê huqûqî yê mîyanneteweyî çinî yeno hesibnayîş û wina vat: “Tecrîd binpaykerdişê heqî yê cidî yo. Tecrîdo ke serê Birêz Abdullah Ocalanî de dîyayo destpêkerdiş heme zîndanan û serê komelî de vila bîyo.”

 

‘Ganî kontrolêk bi tesîrin bibo ke vernîya xo bivîno’ 

 

Şehrîbane dewamê qiseykerdişê xo de bale ant serê nizdîbîyayîşê Ewropa yê hemverê waştişê azadîya Abdullah Ocalanî û nê çîyan vat: “CPT rêxistinêk ke welatê serdest awan kerdî yo. No sîstem seba kontrolê sîstemê îşkenceyî yê Îmraliyî rapor hadre nêkeno û qerarêk pozîtîf nêdano. Vera hende çîyan demêk kilm de Mehkemaya Heqanê Merdiman a Ewropa derheqê Abdullah Ocalanî de qerarê ‘heqê hêvîye’ da. Komîteya Heqanê Merdiman a Yewbîyaye seba pêvînayîşê bi Birêz Ocalanî reyde qerar da. La Tirkîya bi bahanayê cîyayan nê çîyî asteng kena. Ganî Neteweyê Yewbîyaye û Yewîya Ewropa bi hawayêkê tesîrin kontrol pê bîyarê.”

 

‘Muracatî bê netîce manenê’ 

 

Şehrîbane heto bîn de ard ziwan ke tecrîd problemê OHD û dezgehê heq û huqûqî nîyo, tecrîd Wezîrîya Edalet û baroyan zî eleqedar keno û wina dewam kerd: “Tirkîya de atmosferêk sîyasî û caardişê faşîstî beno sebeb ke muracatî bê netîce bimanê. Ma sey OHDyî bi kampanyaya îmze û muracatê seba pêvînayîşî pê anê. Reyna baroyî serê şûbeyê OHDyî ra muracatê Yewîya Baroyan a Tirkîya da û baro zî na babete de kewt têgêrayîş. Tecrîdo ke nika pê yeno tena rojeva kurdan de nîyo. Sîstemê uca binpaykerdişê heqan pê ano. Coka ra netîceyê muracatê ma no het ra muhîm o.”

 

‘Qiseykerdişê tecrîdî bîyo sûc’ 

 

Şehrîbane qiseykerdişê xo wina dewam kerd: “Tecrîdê serê Abdullah Ocalanî tesîr serê pêro hetê komelî û muxalefetî kerdo. Wextêk nêzdî de rojnameger Merdan Yanardag seba derheqê tecrîdî de qisey kerd, tepişya. Rexnekerdişê tecrîdî bî babeta sûcî. La no bi tu hawayî nêeşkeno bibo suc. Seba nê zî berzkerdişê vengê vera tecrîdî, zêdeyêr qiseykerdişê tecrîdî do netîceyê pozîtîf vejo werte û do muracatê ma bi pozîtîf netîce bibê.” 

 

Cewab Wezaretê Edaletî ra nêame 

 

Şehrîbane dîyar kerd ke sey Merkezê Pêroyî yê OHDyî û şubeyê bînî, OHDyê Rihayî zî muracatê Baroyê Rihayî kerdê la hema cewabêke nêgirewtê. Şehrîbane wina qedêna: “Ma serê baroyan de muracatê yewîya Baroyan û wezaretê edaletî kerd.  OHDyê Rihayî muracatê Baroya Rihayî kerd. La cewab ne baro ra ne zî wezaretê edaletî ra ameyo. Hemverê tecrîdî ganî ma veng vejê. Rewşa veng nêro vetiş de do binpaykerdişê heqan zêde bibê. Ganî komel bi nê hişmendî hemverê binpaykerdişê heqan vengê xo berz bikero.”