AMED - Cinîyê ke Dîclekentî de ciwîyenê dikanê Safîye Çobane de awa firîngîye virazenê. Cinîyê ke xebatêk komunal vejenê raşte, bi rihê paştîdayîşî hetkarîya yewbînan kenê. 

 

Safîye Çobane 8 serrî verê cû Dîclekent de dikanêk seba viraştişê awa firingîye akerd. Safîyeye waşt ke no kar bajar de bi paştîdayîşê cinîyan dewam bikero. Cinîyê cîranê aye ya zî cinîyê ke nê çîyî pê hesîyayî yenê kişta Safîyeye û pîya awa firingîye virazenê. Safîyeye vera zîhnîyetê adetî yê camêrdî de karê xo xeylê taybet vînena û wina vat: “Wexto ke cinî zede de manena kewena hucreyêk tarî, la qet şik çino ke mîyanê qulê dêsî de roşnayêk yena. Lazim keno ke na roşnaye taqîp bikera û biveja.” 

 

Mîyanê bajarî de xebatêke komunal 

 

Safîye Çobana ke 36 serrî ya û Sûr de ameya dinya, 8 serrî yo awa firingîye vejena. Safîyeya ard ziwan ke karê awa firingîye ra ver karê tekstîlî kerda. Safîyeye qala qerardayîşê viraştişê awa firingîye kerd û wina vat: “8 serrî verê cû ez fikirîyaya û mi vat no kar tena fabrîkayan de û dewan de virazîyeno. Mîyanê bajarî de çin o. Mi vat ke ez bajar de bikera. Cinî bi nê çîyî qayîl ê. Cinî hewayo germ û pakîye vera nêwazenê keye de virazê. Coka ra no ca înan rê asan yeno. Cinîyî yenê tîya, goreyê waştişê xo, xo rê awa firingîye virazenê.” 

 

Viraştişê awa firingîye 

 

Safîyeye dewamê qiseykerdişê xo de dîyar kerd ke firingîyê ke kenê salçe, Qerejdaxî ra yenê û wina dewam kerd: “Pîqab şino dewe û goreyê waştişê cinîyan firingîyan ano. Wexto ke firingîyê înan yenê, ez xebere dana înan û yenê tîya, firingîyê xo herînenê. Tîya de ronişenê, şuyenê û wirdi kenê. 2 rojan de zuha benê. Roja hîrine de firingîyê înan makînaye ra derbaz benê û benê keye. Dimayê hîrê rojan zî danê verê tîje û awa firingîye hadre bena. Her çî bi destê înan yeno viraştiş.”

 

'Seba cinîyan rayîrêk abî’ 

 

Safîyeye bale ant serê xebata komunal û da zanayîş ke cinîyan rê rayîrêk abîyo. Safîyeye dîyar kerd ke cinîyan reyde hem karêk komunal kenê û hem zî yenê têkişt. Safîyeye ard ziwan ke cinî awa firingîye ya fabrîkayan nêwazenê û yenê dikanê mi ke salçe virazê. Safîyeye wina dewam kerd: “Verê cû cinî, dewam ra zî ameyêne. Dima ra makîna şî dewe, ê zî uca de virazenê. Ez seba cinîyan karêk taybet kena. No seba cinîyan averşîyayîşêk gird o mi gore. Mi çîyêk weş bi înan mojna.”

 

'Cinî cuyêka hepskerde qebul nêkenê’ 

 

Safîyeye binê zîhnîyetê adetî yê camêrdî xêz kerd û ard vîr ke vera zîhnîyetê cinîye de cinî êdî hişyar bî. Safîyeye ard ziwan ke cinî eşkena her hetî ra bixebeta û her çîyî bikera û wina vat: “Cinîye cuyêka hepskerde qebul nêkena. No zîhnîyetê sîstemî yo. Wa qet sere çewt nêkerê.”

 

'Cinî bibedelîya, dorme zî bedilîyeno’ 

 

Safîyeye dîyar kerd ke cinî wexto ke bibedelîya, dorme zî bedilîyeno û vatişê xo wina qedênaye: “Wexto ke cinî gamêk bierza, gama bîne zî pey aye de yena. Bi hezaran cinîyan canê xo feda kerdî û mojnayî ke ê eşkenê her çîyî bikerê. Wexto ke cinî zere de biba kewena hucreyêk tarî la qet şik çin o ke mîyanê qulê dêsî de roşnayêk yena. Lazim keno ke na roşna bêra taqîpkerdiş û bêra vetiş.”