MERKEZÊ XEBERAN - Hûmara 193ine rojnameyê Xwebûnî ke hewte ra reyke vejêno, bi manşetê “Aştî Nefesa Gelan e” vejîya vernîya wendoxanê xo.

 

Rojnameyê Xwebûnî no hewte bi minasebetê 1ê Êlule Roja Aştî ya Dinya manşetê xo de ca dayo prosesê şer û aştîya dinya û rolê Rayberê PKKyî Abdullah Ocalan ê seba aştîye. Rojname, serê hewldayîşê Rayberê PKKyî Abdullah Ocalanî yê aştîye ke serran ê 1993 ra heta nika dewam keno, vindert. Rojname, no hewte serê muhîmî, mana û têkoşînê seba aştîye bi pawitoxê heqê merdiman Akin Bîrdal reyde roportaj kerdo. 

 

Rojname surmanşetî de zî ca dayo amanc û amadekarîyê Konferansê Cinîyan ê Neteweyî. Verfeka Meclîsê Cinîyan ê Partîya Çep a Keske Canan Calagan serê prosesê konferansî de agahîyê hîra dayo.

 

Reyna bi minasebetê 1ê Êlule Roja Aştîye ya Dinya bi Endama Meclîsê Dayîkanê Aştîye ya Amedî Havva Kiran reyde roportaj ameyo kerdiş.  Havvaye serê têkoşînê dayîkan ê seba aştîye û helwestê dewlete yê hemverê dayîkan de qisey kerda.