AMED - Senem Erîşe derheqê kampanyaya ke Meclîsê Ciwanan ê Partîya Çep a Keske daya destpêkerdiş de qisey kerd û venga têkoşîn û rêxistinkerdişî bi cinîyê ciwan û bi pêroyê ciwanan kerd.

 

Polîtîkayê şerê taybet yê îqtîdarîya AKP-MHPyî Kurdistan de dewam keno. Tabî qet şik çin o ke hedefê ewilî yê nê polîtîkayan cinî, ciwan û tut ê. Bi giranbîyayîşê tecrîdî reyde şer zî giran beno û rêxistinbîyayîşê ciwanan ê vera nê caardişan bale anceno. Meclîsê Ciwanan ê Partîya Çep a Keske vera polîtîkayê şerê taybetî de 5ê Tebaxe de kampanyayêke bi şîarê ‘vera şerê taybetî de têkoşînêk bi heybet’ da destpêkerdiş. 

 

Endama Meclîsê Ciwanan a Partîya Çep a Keske Senem Erîşe derheqê kampanyaye de ajansê ma rê qisey kerd.

 

‘Rotoxê tîryakî nê, ma yenê tepiştiş’ 

 

Seneme da zanayîş ke Kurdistan û Tirkîya de problemê ekonomî û îdeolojîk yê ciwanan esto û ê na babete çarçeweya polîtîkaya şerê taybetî de gênê dest û vat: “Şerê taybet Kurdistan de bi hawayêkê giran yeno rayraberdiş. Çeteyê tîryak û fuhuşî, mafya zêde bîyê. Ewro ma Kurdistan de bikewê kam ci taxe emrê şixulnayîşê tîryakî kewto 9-10 serrî. Xebatê ke ma vera nê polîtîkayan de rayra benê zî hetê sîstemî ra yenê astengkerdiş. Rotoxê tîryakî nê, ma yenê destbendkerdiş û tepiştiş. Wexto ke ma vera tîryakî de çalakîye pê anê, ma yenê destbendkerdiş. Bernameyê ramitişê bîsîkletî ke Meclîsê Ciwanan ê Muşî pê ard de embazê ma ameyî destbendkerdiş.”

 

‘Dewlete hewldayîşê rayîr ra vejîyayîşî pê ana’

 

Seneme dewamê qiseykerdişê xo de nê çîyan vat: “AKP-MHP polîtîkaya şerê taybetî Kurdistan de bi taybetî serê cinîyan de pê ano. Kurdistan de serê cinîyan de şerê taybet hîna zêde bi tesîr o. Bi fuhuşî hewl danê cinîyan bifînê. Wazenê profîlê cinîyan ê goreyê xo awan bikerê û cinîyan Kurdistan de bikerê binê lepanê polîs û leşkeran. Bi no hawa wazenê cinîyan têkoşînî ra dûrî bigîrê.”

 

‘Problemê yewine tecrîd o’ 

 

Seneme bale ant serê tecrîdê Îmraliyî ke her ca de vila bîyo û dîyar kerd ke problemê tewr gird tecrîd o û heme komelî ser de tesîr viraşto. Seneme qiseykerdişê xo wina dewam kerd: “Bi girankerdişê tecrîdî reyde hewl danê têkoşînê cinîyan û ciwanan bixitimnê. La tu hêz nêeşkeno ma bido vindertiş. Ma baş zanê ke bi wedaritişê tecrîdî reyde do raşteyê têkoşînî hîna zêde hîra bibo. No het de sîstem tecrîdê Îmraliyî giran keno.”

 

Amacê kampanyaye: Teşîrkerdişê şerê taybet o

 

Seneme peynîya qiseykerdişê xo de da zanayîş ke amacê kampanyaye teşhîrkerdişê şerê taybetî yo û wina peynî ard: “Ma do bi ciwanan reyde bêrê têhet û bernameyê xo yê sey vilakerdişê vilawekan, daliqnayîşê afîşan, tîyatro, kilmefîlm, yembînan dîyîş, ramitişê bîsîkletî pê bîyarû. Amacê ma teşhîrkerdişê şerê taybatî yo û bi ciwanan reyde mîyanê komelî de awankerdişê zîhnîyetî yo. Ma heme ciwanan dawetê têkoşînê rêxistinkerde kenê.”