MERKEZÊ XEBERAN - Hîrê cinîyan ra yew dem bi dem bi enfeksîyonê vajînal reyde yenê rî bi rî. Pispora Welidnayîş û Nêweşîya cinîyan Dr. Başar Onal da zanayîş ke enfeksîyono ke nêro dermankerdiş rayîr ver bi nêweşîyanê cidî akeno.

 

Weşîya vajînal yew parçeyê muhîm ê weşîya cinîyan a. Enfeksîyon xeylê xo rayîrê welidnayîşî de yenê vînayîş. Nîşaneyê enfeksîyonê vajînal goreyê tewiran vuryeno. Hek yan zî tehrîşbîyayîş, demê îdrarî de dej û veşnayîş vejêno werte.

 

Sebebê enfeksîyonê vajînal

 

Pispora Welidnayîşî û Neweşîya cinîyan Dr. Başar Onal da zanayîş ke enfeksîyono ke nêro dermankerdiş rayîr ver bi nêweşîyê cidî akeno û faktorê enfeksîyonê vajînal ke tesîrê negatîf keno wina rêze kerd:

 

*Şuxulnayîşê antîbiyotîkî

 

*Seba diganebîyayîş, şit dayîş yan zî menopoz de hormonan de vurnayîş

 

*Şutişê vajinal

 

*Dekewtişê sîstemê pêroyî

 

*Şuxulnayîşê tamponê bi boydaye

 

*Şuxulnayîşê spreyê vajinal

 

*Nêweşîyê bi rayîrê têkilîyê cinsî derbaz benê

 

*Şuxulnayîşê jelê ke sperman kişenê

 

Tewirê enfeksîyonê vajînal

 

Başare da zanayîş ke enfeksîyonê vajînal goreyê kesî vuryeno û tewir û sebebê ci wina rêze kerd: 

 

Enfeksîyonê mantarî (kandidiyaz): Cureyê enfeksîyono ke tewr zêde yeno vînayîşî yo. Hîn şuxulnayîşê tewirê antîbiyotîkan eşkeno rîskê nê enfeksîyonî zêde bikero.

 

Vanjînozîs bakterîyel: Netîceyê kêmbîyayîşê bakterîyê ke bi hawayêkê normal vajînaye de estê, pêmawitişêk hucreyî vejîyeno raşte. No zî şeklêk tewr zêde yê enfeksîyonê vajînalî ke yeno dîyîş ra yo. Awa ke vajînaye ra yena bo boye ya. Zêde hur çin o, la hur eşkeno zêde zî bibo. 

 

Trichomonas vajiniti (trichomoniasis): No enfeksîyon bi rayîrê têkilîya cînsî vejîyeno raşte. Îdrarî de dejêk virazeno. Heto bîn de vajînaye de tehrîşbîyayîş, sûrebîyayîş û masayîş vejîyeno raşte. 

 

Atrofik vajinit: Atrofik vajinit enfeksîyonêk ra pê nîno. Badê şitdayîş û menopozî vejîyeno raşte. Wexto ke hormonê cinîbîyayîşî kêm benê de vejîyeno raşte.

 

Başare dewamê qiseykerdişê xo de da zanayîş ke her awa ke vajînaye ra yena enfeksîyon nîya û awa vajînaye nîşaneyê sîstemê welidnayîşî ya cinîye ya.

 

Metodê dermankerdişî 

 

Başare derheqê dermankedişê enfeksîyonê vajînalî de zî wisey kerd û dîyar kerd ke dermankerdiş goreyê tewirê enfeksîyonî bedilîyeno û wina qiseykerdişê xo peynî kerd: “Bi çend antîbîyotîk cîyayan eşkeno bêro dermankerdiş. Antîbîyotîk ya fek ra yeno girewtiş, ya zî sey krem, jel yeno şuxulnayîş. Enfeksîyonê ke nînê dermankerdiş kisirbîyayîşî ra beno ra rayîr akerî. 

 

Çîyê ke ganî merdimî baldar bibo wina yê: 

 

 *Ganî metodê hîjyenî baldarî bibo.

 

 *Ganî kincê binî yê peme bêrê şuxulnayîş.

 

 * Ganî kincê binî demêk kilm de bêrê bedilnayîş.

 

 * Ganî kincê binî yê tengî nêrê tercîhkerdiş.

 

 * Ganî bi sîstematîk gidayê probîyotîk bêrê xebitnayîş.