STENBOL - Rojnamegera Îranî Mîna Saadadîye ke sey koçbera sîyasî şî Hollanda, derheqê xoverdayîşê cinîyan ê Îranî de ercnayîş kerd. Mîna da zanayîş ke xoverdayîşê cinîyan bi cesaret vila beno û venga ‘bibê yew, amade bibê û sere çewt mekerê’ kerd. 

 

Cinîya Kurd Jîna Emînîye Tehran de hetê polîsanê ‘exlaqî’ ra bi îşkence ameybî qetilkerdiş û a roje ra nata Îran û bajaranê Rojhelatê Mîyanenî de cinîyan bi sloganê ‘jin jiyan azadî’ dest bi protestoyan kerd û 11 aşman protesto dewam kerd. Cinîyan vera teda û zextan raşteyan nêterikna û seba azadîya xo xover da, têkoşînê xo roj bi roje gird kerd. Girdbîyayîşê xoverdayîşî vera îqtîdarîya dewleta Îranî lerza, heme heqê cuye ameyî hesibnayîş û hewl danê cinîyan hepsê keyeyî bikerê. Heto bîn de zî wendekarê kênayî yenê jehrkerdiş û rojnamegerî yenê tepiştiş. 

 

Rojnamegera Îranî Mîna Saadadîya ke serra 1990î de Îranî ra sey koçbera sîyasî şîya Hollanda, derheqê xoverdayîşê cinîyan de ajansê ma rê qisey kerd.

 

‘Xoverdayîşê cinîyan mohrê xo da tarîxî ro’ 

 

Mînaye derheqê protestoyê ke nizdîyê yew serrî yo bi sloganê ‘jin jiyan azadî’ dîyayo destpêkerdiş de qisey kerd û vat: “No xoverdayîş têgêrayîşêk tarîxî awan kerd. Cinîya ciwan a kurde Jîna Mahsaye hetê polîsê exlaqî ra ameye qetilkerdiş. Cenazeya aye ke bajarê kurdî Saqqezî de ameye definkerdiş, pêroyê welatî de hetê cinîyan ra têgêrayîşêk tarîxî vet raşte. Şarê kurdî mezelê aye ser de sloganê ‘jin jiyan azadî’ berz kerd. Cinîyan laçikanê xo vêşna. Her çar hetê Îranî ra şar kom bî û bi aşman çalakîye pê ard. 44 serrî ra dima welat de çakalîyan mohrê xo da tarîx ro. Zan-Zendegî-Azadî. No têgêrayîşo xurt, cinî û camêrdan pîya herikna raşteyan.” 

 

‘Jin jiyan azadî’ cayêk raşt û demêk raşt de ame vatiş’ 

 

Mîna bale ant serê sloganê ‘jin jiyan azadî’ ke Îran de hetê cinîyan ra ameyo esasgirewtiş û wina dewam kerd: “Îran de sloganê Jin ‘jiyan azadî’ cayêk raşt û demêk raşt de ame vatiş. Nê protestoyan de rolê aktîvîst û komê Kurdistanî zaf muhîm o. Raşteyê mîyanneteweyîye de veng da. Vera xeylê aktîvîst, sîyasetmedar û rojnamegerê cinîyî ameyî tepiştiş zî xoverdayîş dewam kerd û sebebê nê zî cesareto ke welat de vila bîbî yo. Bi taybet neslo newe ke ma ci rê vanê ‘z’ girdbîyayîşê xoverdayîşî de rolêk gird kay kerd. Protestoyê girseyî bi deshezaran kesî cesaret kerd. Cesaret çîyo ke vila beno yo. Sere de cinî û camêrd, ciwanî tewrê têkoşînî bîyî.”

 

Sebebê sloganê ‘Ma to ra û dînê to ra nefret kenê’

 

Mîna dewamê qiseykerdişê xo de dîyar kerd ke nê prosesî de xeylêk daliqnayîşî pê ameyê û wina vat: “Bi qetilkerdişê xoverdayoxan hewl dayî xoverdayîş bidê vindarnayîş. Amancê teda û înfazan awankerdişê tersî û vindarnayîşê protestoyan bî. Ma 100 serrî tarîxê peyîn yê Îranî ra biewnê. Rejîmê Îranî seba muxalefet bipelçiqno, îşkence û înfaz ca ano. Komara Îslamî ya Îranî xo sey hukmatê Homayî vînena. Kesê ke daliqnenê zî sey dişminê Homayî vînenê. Protestoyê serra vîyarte de merdimê ke yew bi yew vatî, ‘ma to ra û dînê to ra nefret kenê’. Sebebê nê zî no bi.”

 

‘Têkoşînê cinîyan rayîrê çareserîya newe mojna’

 

Mîna dîyar kerd ke xoverdayîşê ke ameyo ciwîyayîş, toximê xo dayê û wina vat: “Protestoyî dewam kenê. Cinî her roje çalakîyan kenê. Sereyê xo akenê, vejîyenê kuçeyan û polîsan goşdarî nêkenê. No vindertişê cinî, kuçeyê Îranî vurna. Hetê karker, mamoste, hemşire û teqawîtan ra  her roje çalakî pê yenê. Xoverdayîşî dewam kenê. Rayîrê azadîya cinîyan Îran de abîyo. Têkoşînê cinîyanê Îranî rayîrêk çareserîya newe mojnaya. Seba çareserî gêrenê, bi cesaret pesnê xo danê.” 

 

‘Bibi yew, amade bê û sere nêtewênê’ 

 

Mîna vat no xoverdayîşo bi heybet ê cinîyan Îran de hêz û hêvî dayo aye zî û wina qedêna: “Rejîm, bi serran o komel ra visîyayo. La ma dî ke cinî û camêrdî seba heqê cinîyan pîya têkoşîn kenê. No cesareto ke cinîyan serra vîyarte mojna, xeylêk pîl bî. Xeylêk cinî ameyî tepiştiş la têkoşîn gane verdayî. Çareserî bi têkoşînê hempar mumkin o. Seba cinîyan  têkoşîn ferz o. Wendekar, karker, mamoste û komê bînî, ganî hemverê rejîmî bieşkê vinderê. Bibê yew, amade bê û sere nêtewênê.”