Mîdye miqted

 

HELEB - Endama Ofîsê Cinîyan ê Şaredarîya Taxa Şêxmeqsûdî Lezgîn Ebdo derheqê projeyê awe de da zanayîş ê wazenê bi xususî seba cinîyanê Taxa Şêxmeqsûdî rê bibê hetkar û wina vat: "Problemê awe verê de na taxe de esto la bi xususî mewsimê hamnanî de no problem zaf beno. Seba ke aşma hamnanî de êdî awe zî kêm bena û cinîyê taxe zêdeyêr astengîyê hem kêmbîyayîşê awe ancenê. No projeyê ma zî muhîmîyê ci oyo ke ma bi cinîyê taxe rê bibê hetkar."

 

Dimayê şerê ke taxa Şêxmeqsûdî de hetê çeteyan ra serra 2013ine de dest pêkerd û 2016ine de peynî bî, êdî taxe de xeylêk zirarê merdimayî û madî virazîyayî. Bi hezaran keye û rayîrê awe zirar dî. Bi xususî xirakerdişê rayîrê awe zêdeyêr astengî seba welatijê taxe viraşt. Ofîsê Cinîyan ê Şaredarîya Taxa Şêxmeqsûdî seba problemê awe safî bikero, dest bi projeyêk newe kerd. Endama Ofîsê Cinîyan ê Şaredarîya Taxa Şêxmeqsûdî Lezgîn Ebdo derheqê na proje de qisey kerd. 

 

Seba problemê awe proje amade kerdê

 

Endama Ofîsê Cinîyan ê Şaredarîya Taxa Şêxmeqsûdî Lezgîn Ebdo derheqê projeyê înan ê newe de wina ajansê ma rê qisey kerd: "Ma projeyêk xo yê newe dayî awankerdiş. No proje zî dergkerdişê xetê awe yê cayê bi nameyê Şiqeyef heta ver bi kolanê pakrewan Gelhatî yo. Na xete do serê 8 komînan ke bi pêroyî bena 1500 keye do bêra dergkerdiş. Seba ke problemê awe werte ra wedarîyê, no proje muhîm o.”

 

Hetkarîya seba cinîyê taxe 

 

Dewamê qiseykerdişê xo de Lezgîne derheqê problemê awe de nê çîyan ard ziwan : “Problemê awe verê cû ra na taxe de esto, la bi taybetî demserrê hamnanî de no problem zaf gird beno. Çike aşma hamnanî de êdî awe kêm bena û cinîyê taxe hîna zêde problemê kêmbîyayîşê awe ciwîyenê. Muhîmîya nê projeyê ma zî no yo ke ma bi cinîyê taxe reyde bibê hektar.” 

 

Tesîrê ambargoye 

 

Lezgîne da zanayîş ke seba çareserîya înan proje hadre kerdî û wina vat: “Do projeyê ma 20 rojan dewam bikero. Vera ambargoye de ma hewl danê çareserîye bidê awankerdiş. Taxe ser de ambargo esta. Tîmê çarine yê girêdayeyê hukmatê Şamî serê bendê kontrolî yê xo de çîyê ke lazimîyê merdimîye yo, bi rojan dano vindertiş û heta ke derbazî taxe bibo êdî nîmeyê nê lazimîyan xo rê wedarneno. No tesîrêk xirab serê cuya hemwelatijanê taxe de keno.”