COLEMÊRG - Gevero ke seba Dayîkanê Aştîye Pêrîşan Akçelîk û Adalet Safali ke netîceyê qezaya trafîkî de dinyaya xo bedelnayî, ciwanan çalakî organîze kerd û di mabêne înan û polîsan de şer vejîya.

 

Taxa Orman, Kişla, Esentepe û Yeşîldere ya qezaya Geverî ya Colemêrgî de ciwanan seba Dayîkanê Aştîye Pêrîşan Akçelîk û Adalet Safali ke seba îfadeyî şîbî û demê agêrayîşî de qezaya trafîkî derbaz kerdî û dinyaya xo bedelnayî, çalakî organîze kerd. Ciwanê ke taxan de ameyî têhet, heta saetê ereyê şanî bi polîsan reyde şer kerdî. 

 

Ciwanan rayîr trafîk rê padayî û fîşekê hewayî teqênayî. Polîsan zî bi mermîyê plastîk û bombayê gazî hêriş kerd. Polîsan saetê ver bi serê sibayî de merşê mehterî dayî piro û taxan de tûr eştî. Welatijê taxe vatî, erebeyê polîsan de vengê, "Ma bidê înan ro. Êdî bes o" eşnawitê.