AMED – Yew bajaro ke qeyûm problemanê tede çareser nêkeno Amed o. Amed de problemê yewine ra yew zî eşteyê bajarî yo. Hemwelatijan reaksîyon mojna çaresernêkerdişê problemê eşteyî û vatî: “Seba ke tîya Kurdistan o peygoş kenê.” 

 

Qeyûm sey her cayî Amed de zî tena wextê weçînayîşî de lazimîyê hemwelatijan ano xo vîr. No caardiş zî beno sebebê çaresernêkerdişê probleman. Amed de qeyûm hem bêusûlîyê ke keno beno rojeve û hem zî hetê problemê eşteyê bajarî ra beno rojev.

Hemwelatijê amedijî derheqê babete de qisey kerdî.

 

'Ma sibarojê xo destê dewlete de nêwazenê verdê’

 

Elif Karadage da zanayîş ke Kurdistan de îqtîdar goreyê lazimîyê şarî polîtîkayan aver nêşino û wina vat: “Ma taxa feqîran ê Amedî de hîna zêde eşteyan vînenê. Şar gerreyê xo yê vera nê caardişî mojneno. La şar terseno ke gerreyê xo bikero. Seba ke raşteyê Amedî destê qeyûmî de yo coka hende lêşin û bêsîstem o. seba ke tîya Kurdistan o coka ra peygoş kenê. Ma nêwazenê weçînayîşê hêrêmî yê vernîya ma de qeyûm bêro tayînkerdiş. Ma nêwazenê sibarojê xo bidê destê dewlete.” 

 

‘Problemê eşteyî zî caardişêk vera kurdan o’

 

Şemsixan Ozbaşa ke gerreyê şaredarîya qeyûmî kena wina vat: “Tîya bi eşteyî dekerde yo. Sergo yo. Ez bi nêweşîya astimî ya, merdim mîyanê eşteyêk winasî de nêeşkeno biciwîyo. Ez mecburî bi xo dorme pakî kena. Ê bi nê karî meaş herînenê la karê xo zî nêkenê. Merdim wazeno ke cayo ke tede ronişeno pakî bibo. Cîranî xora pakî nêkenê, şaredarî zî pakî nêkera do senî bibo? Boya eşteyî tîya ra yena. Keyeyê ma çin o, ma tîya de kîra de yê. Mecburî ma ancenê.” 

 

'Ma Amedêk pak wazenê’ 

 

Mulkîye Gogerciya ke taxa Rezan a Amedî de ronişena, da zanayîş ke raşte pêro lêşin o û wina dewam kerd: “Ma gerreyê şaredarîye kenê. Ma taxêke, dormeyêk, Amedêk pak wazenê. Wa bajarê ma zî sey bajarê bînan pakî bibo. Kuçeyê ma ke ma tede ronişenê zaf lêşin o. her ca de boya eşteyan yena. No mird nêkeno, ma û gandarê bînî nêweş kewenê.” 

 

'Boya pîs taxe ra yena' 

 

Esma Howarîya 10 serrî ke şerê Sûrîye ra remaya û ameya Amed de ca bîya zî vat: “Ez taxa Rêzan de ciwîyena. Tîya de tu pakîyêk çin o. Taxa ma zaf pîs a. Şaredarî karê xo nêkeno. Dorme de eşte xeylê zêde yo. Coka ra zî boya pîs yena. Ma xeylê aciz benê. Ma gerreyê şaredarîye kenê.”