MÊRSÎN - Parlamentera Partîya Çep a Keske Perîhan Koca Konferansê Cinîyan ê Bajarî de qisey kerd û bale ant serê têkoşînê hempar ê prosesê neweawankerdişî de.

 

Meclîsê Cinîyan ê Bajarê Partîya Demokratîke ya Şaran (HDP) û Partîya Çep a Keske ya Mêrsînî çarçewaya prosesê neweawankerdişî de konferansê cinîyan ê bajarî organîze kerd. Konferans, Merkezê Kulturî yê Sanatoliayî ame organîzekerdiş û pankartê bi kurdkî û tirkî yê “Ma xo bi serewedaritişê xo birêxistin kenê, azadîya xo pawenê” ameyî daliqnayîş. Temsîlkarê rêxistine û sazgehê cinîyan ê bajarî zî tewrê konferansî bî. Konferans, bi deqeyêk rêzgirewtişî dest pêkerd. 

 

Dima ra zî Hemsereka HDPyî ya Mêrsînî Bedriye Kuş qisey kerd û bale ant serê rolê cinîyan ê prosesê neweawankerdişî de.

 

Muhîmîyê têkoşînê hemparî

 

Parlamentera Partîya Çep a Keske ya Mêrsînî Perîhan Koca zî bale ant ser muhîmîyê têkoşînê hempar ê prosesê neweawankerdişî de û wina vat: “Ma do xerîteya rayîrê serdemê newe tîya xêz bikerê. Cinî, karker û kedkarî hema zî kuçeyan de yê. Cinîyê kurdî, femînîst û karkerî sere wedarnenê. Ma key qalê têkoşînê hempar bikerê, o wext ma do serê çareserî de qisey bikerê. Lazimîya ma bi xerîteyarayîrîyêke newe esta ke herêman ra xurt bikerê. Mêrsîn de lazimî bi têkoşînê hemverê şîdetê serê cinî û şuxulnayîşê tiryakî esto. Yew bajarê ke potansîyelê ci seba têkoşînî tewr zêde esto Mêrsîn o. Lazimî pîşkerdişê têkoşînê hempar esto. Ganî ma pêro zî xo parçeyêk pêşnîyazîyê çareserîyê seba Mêrsînî bivînê.”