AMED - Licê yo ke qeyûm tayînî şaredarîya ci ame kerdiş, welatijî qeyûman ra gerrkerdox ê. Welatijî mecbûrê awa bîrî yenê verdayîş. Sewbîna welatijê seba kanalîzasyonî akerde yenê verdayîş, birnayîşê awe ra rayîrê xiraban ra reaksîyon mojnenê.

 

Bajarê Kurdistanî de bi fermanê Wezaretê Zerreyî qeyûm tayînê şaredariyê HDPyî ameyî kerdiş. Roja ke qeyûm ameyo tayinkerdiş, tenê polîtîkayê rant û talanî rayra beno. Her roje bêusulîyê neweyî yê  qeyûman vejîyenê werte. Licêyê Amedî de zî qeyûm tu kar û xebate nêkeno û tenê polîtîkayê rant û talanî rayra beno.

 

'Şaredarî bi probleman eleqedar nêbena'

 

Welatija bi nameyê Xanime ard ziwan ke şaredarî çîyêk seba înan nêkena û wina vat: "Bi problemê taxe reyde eleqedar nêbeno. Ma wazenê taxa ma de problemî nêmanê. Labelê wexto ke ma nê vanê, ma bêhêvî yê. Seba şaredarî bi probleman eleqedar nêbena. Ma wazenê problemê awa ma ra biewnê. Ez û kênaya xo ma tenê ciwîyenê. La hêzê ma bi tenê sereyê xo qîmê çîyêk nêkeno. Awa ma çin a, ma bîr ra awe ancenê. Ma awa bîrî şiminenê.”

 

Qeyûm vano 'awa bîrî' bişiminê 

 

Xanime da zanayîş ke seba çareserîya probleman ê şîyê verê selahîyetdaran û înan zî vato ma do hel bikerê labelê problemî dewam kenê. Xanime dîyar kerd ke înan xeylê rey gerre kerdo û wina vat: "Herra serê rayîrî her dem ma nêrehet kena. Keyeyê mi de pakitî nêmende. Keyeyê mi de 15 rojî awe nêameye. Mi 15 rojî awa bîrî şimite. Şaredarî mi ra vat, awa bîrî bişimine. Rayîrê ma yo akerde ame padayîş.”

 

Licê ma xira kerdî

 

Cinîya ke Licê de ameya dinya û nêwaşt nameyê xo bida, dîyar kerd ke herra înan her roje yena talankerdiş û vat, tîya awe bi nîzam nîna la hîn dewan de qet çin a.

 

'Fekê kanalîzasyonan bi zanabîyayîş akerde verdenê’

 

Ferda Ozka dîyar kerd  şaredarî taxa înan de xebate nêkeno û vat: "Ma gerreyê xo kerd. Awa ma birnenê û bi saetan awe nîna. Awa ma pak nîya. Ma zî mecbûrî keye de germ kenê û şimenê. Seba ke ma kurd ê peygoş kenê. Ê tîya reyde eleqedar nêbenê. Ma nêeşkenê tutanê xo vejê teber. Ma ra pereyan gênê labelê nêdanê ma. Bi di serrî yo kuçe û rayîrê ma mîyanê rewşêke baş de nîyê. Fekê kanalîzasyonan bi zanabîyayîş akerde verdenê. No zî seba kezeba ma baş nîyo. Beno sebebê nêweşîyan û tutê qijî eşkenê bikewê ci. Rayîrî zî xirab ê û nêvirazenê.”

 

'Bi 2-3 serrî yo ma rewşêke perîşan de yê'

 

Xezal Polate bi nêzdîyê 40 serrî yo Licê de manena da zanayîş ke tenê wextê weçînayîşî de yenê vîrê qeyûmî û selahîyetdaran û wina vat: "Seba tozî ma nêeşkenê camê xo abikerê. Ma nêeşkenê taxe de rayîr ra şêrê. Bi 2-3 serrî yo ma rewşêke perîşan de yê."

 

'Selahîyetdarî bi probleman reyde eleqedar nêbenê'

 

Lorinda Polat ke seba unîversîta amadekarî ke da zanayîş ke selahîyetdarî probleman reyde eleqedar nêbenê û wina vat: "Ez lokanta de şuxulêna. Seba ke awe yena birnayîş ma cayê  kar û keyeyî de tengasîyê pîlî vînenê. Awe nîna û hetê pakîtî ra zî problemî vejîyenê. Ma nêeşkenê cilanê xo zî bişuyê. Seba awe ameye birnayîş, cinîyêke kewte depoyê awe û ceyran aye girewt û dinyaya xo bedelnaye.”