COLEMÊRG - Dayîka Aştiye Perîşan Akçelîk û lajê ci Cihan Akçelîk ke wextê semedê îfadeyê dozgerî Gever ra agêrayîne  Colemêrg, qezaya trafîkî derbaz kerdî, dinyaya xo bedelnayî. Cenazeya Perîşane û lajê aye bi sloganê “Şehîdî nêmirenê” ameyî definkerdiş.

 

Colemêrg û qezayê ci de Dayîkê Aştîye zî mîyan de 23 kesî 15ê Tebaxe de sereştişê keyeyan de amebî destbendkerdiş. Dayîkê Aştîye Adalet Safali û Perîşan Akçelîkî ke demê sereştişê keyeyî de keye de nêbî û nêamebî destbendkerdiş. Dayîkê ke nêameyî destbendkerdiş, semedê îfadeyî pêwa avûkatê xo Erdal Safali û Cîhan Ozçelîkî şî Wan. La semedo ke dozgerî cayê xo de nêbi, agêra  Gever. Agêrayîş de serê rayîrê Gever-Wanî de qeza kerdî. Dayîkê Aştîye Adalet Safali û Perîşan Akçelîk û lajê Perîhane, Cihan Akçelîk dinyaya xo bedelnayî. Sewbîna avûkat Erdal Safali ke giranî birîndar bibi zî Nêweşxaneyê Cigêrayîş û Perwerdeyî yê Herêma Wanî de yeno tedawîkerdiş. Ame dîyarkerdiş ke Erdal tehlukeyê cuye derbaz kerdo.

 

Dayîka Aştîye ameye definkerdiş

 

Qeza de Dayîka Aştîye Adalet Safali ya ke dinyaya xo bedelnabî, vizêr şan de bi girseyî dewa Memkavayî de ameye definkerdiş. Sewbîna cenazeya Perîşan Akçelîk û lajê aye Cihan Akçelîk zî serê sibayî morgê Nêweşxaneyê Dewlete ya Geverî de bi girseyî ameyî girewtiş. Cenzaya Perîşan û lajê aye bi tewrbîyayîşê Parlamenterê Partîya Çep a Keske yê Colemêrgî Oznur Bartin, Vezîr Parlak, Onûr Duşunmez, endamê Meclîsê Dayîkê Aştîye, Partîya Demokratîke ya Şaran (HDP), Partîya Herêmê Demokratîke (DBP), Tevgerê Cinîyanê Azadan (TJA) û xeylêk welatijan ra dewa Şahî de bi sloganê,“şehîdî nêmirenê” ameyî definkerdiş.

 

Kîşte tutanê xo de ameye definkerdiş

 

Dayîkê Aştîye, cenazeya Perîşan Akçelîk û Cihanî girewtî serê milê xo û kîşte Kajin Akçelîk (Baz Mordem) ê HPGyîj û Evîn Akçelîk (Nuda Gever) a YPS-JINe ya wextê îdarekarîya xoserî de dinyaya xo bedelnabî, ameyî definkerdiş.

 

‘No têkoşîn do nimced nêmano'

 

Tîya de Hemserekê HDPyî yê Colemêrgî Lokman Ozdemîr qiseykerdişêk kilm kerd û vat: “Serê şarê kurdî sax bo. Ma do têkoşînê dayîkanê xo dewam bikerê. No têkoşîn do nimced nêmano. Sereyê ma pêrûne sax bo."