AMED - Melek Turaya ke sey xozapawitoxêke 30 serrî yo vilan roşena, derheqê veşnayîşê daristanê Koyê Cûdî û talankerdişê xozaya Kurdistanî de wina vat: "Homa awêke nê adirî rê bikero. Şarê ma bindest û feqîr o, wa destê xo nêdê daran. Çinbîyayîşê xoza, çinbîyayîşê merdimî yo. Hemverê hêrişê serê xoza ma do xoza bipawê."

 

Cinîyê Rojhelatê Mîyanênî no bi serran o hemverê fehmê pederşahî xo ver danê û têkoşînêk pîl vejenê werte. Fehmê pederşahî yê bi destê dewlete yeno kûrkerdiş, her ke şino heqê cinîyan yeno binpaykerdiş. Fehmê pederşahî wazeno ke têkilîyê cinî û xoza bibirno û tena verdo. Labelê cinîyê kurdî hemverê nê fehmî xoza tewr zêde pawenê û wayîrê ci vejîyenê. Melek Turay ke bi 30 serrî yo sey karkerêke xozaye ya. Meleke bi serran o sey fikir û fehmêk xozaperest vilan roşena.

 

Meleke (56) bi keda xo hewl dana debara xo bikera. Meleke dewa Bakûstanî ya qezaya Stewrî ya Mêrdînî de yena dinya. 20 serrî de yena zewicnayîş û 1991î de 24 serrîya xo de yena Amed. Amed de karê rotişê vilan musena û qezaya Sûrî de her roja panşeme tezgahê xo akena. Ma serê kedkarîya Meleke û cuya aye de sohbet kerd. 

 

30 serrî yo karê xoza kena

 

Melek Turaya ke dewa Bakûstanî ya qezaya Stewrî ya Mêrdînî de dayîke ra bena, Qoser de pîl bena.  Meleke 32 serrî verê keyeyê xo bena Amed. Melek 30 serrî yo vilan arêdana û bi xoza reyde eleqedar bena. Meleke dîyar kerd ke ciwanîya xo de des bi ramitişê vilan kerda û wina dest bi qiseykerdişê xo kerd: " 32 serrî verê ma keyeyê xo berd Amed û mi dî ke nê cayî de ramitişê vilan esto û mi zî qerar da ramitişê vilan. Destpêk de mi nêrotêne, mi derûdorê berê xo xemilnayîne û keyfê mi xeylêk ci rê ameyîne.  Cîranê derûdorî ameyîne, xo rê berdêne, vistewreyê mi berdêne. Nika zî ez sey karêk kena û her paşeme yena tîya vilan roşena.”

 

'Çinbîyayîşê xoza, çinbîyayîşê merdimî yo’

 

Meleke dîyar kerd ke xoza seba aye xeylêk cayêk taybet gêna û dîyar kerd ke çinbîyayîşê xoza çinbîyayîşê merdimî yo. Meleke wina dewam kerd: "Ez xeylêk xoza, dar û herra hes kena. Cayê ke xoza ci de bina, her çî esto. Wexto ke awe, herre, darî çinîbê, merdim zî çin o.”

 

'Wa destê xo nêdê daran'

 

Meleke bale ant serê qirkerdiş û talankerdişê xozaya Kurdistanî û da zanayîş ke bi veşnayîşê daristanan reyde pêro heywan û gandarî zî mirenê. Meleke wina vat: "Xoza yena veşnayîş, ma zî sey merdim veşenê. Çira daranê ma veşnenê? Wa darî nêrê veşnayîşî. Homa awêke nê adirî rê bikero. Şarê ma bindest û feqîr o, wa destê xo nêdê daran."

 

'Fehmê pederşahî wazeno cinî bikero bindestê xo’

 

Meleke bale ant serê fehmê pederşahî û vat no fehm cinî peyser verdeno û wina vat: "Cinî camêrdan ra jîyatêr ê. Camêrdî bi fehmêk serdestî wazenê ma bikerê bin destê xo. Wa cinî azadîya xo ya ekonomî bikerê destê xo, wa bixebitîyê, biwanê, vejîyê teber.”