AMED -  Amed de awanîyê ke erdlerzî vera zirarêk gird dîbî ganî bêrê rijnayîş, seba ke tedbîr nîno girewtiş cuya hemwelatijan binê tehluke de ya. 

 

Rêça erdlerzo ke 6ê Sibate de merkezê Mereşî de pê ameybî û zêdeyê 50 hezarî ra kes dinyaya xo bedilnabî, hema zî çiman ver de yo. Wexto ke badê erdlerzî Kurdistan, Tirkîya û dinya de seferberîya paştdayîşî da destpêkerdiş, dewlete û îqtîdar nêeşka lazimîyê şarî ca bîyaro. Eksê ci badê çend rojan hukmat resa cayê erdlerzî, badê rojan xebatê cigêrayîş û xelisnayîşî bi kelepulanê kêman dîya destpêkerdiş û bi rojan lazimîyê şarî yê sey wayîrbîyayîş, gida û germkerdişî nêame temînkerdiş.

 

Vera ke hende aşmî derbaz bîyo zî awanîyê ke erdlerzî de zirarê girdî dîyî hema zî nêameyî rijnayîş. Amed zî yew bajaro ke hema zî awanîyê zirardîyaye paweyê rijnayîşî yê ra yew o. Hema zî bajar de awanîyê ke yenê vengkerdiş estê û hemwelatijî mecbur manenê ke teber de biciwîyê. Tedbîrê ke dormeyê awanîyê ke ameyî vengkerdiş de nînê girewtiş, tersêk gird awan keno. 

 

Asayîşê şar û karkeran yeno peygoşkerdiş 

 

Amed de xebata tespîtkerdişê xisarî ke erdlerzî de 7 awanîyî rijîyabî û 414 kesî binê xirban de dinyaya xo bedilnabî de 3 hezar û 252 awanîyî xisarê giran, 2 hezar û 828 awanîyî bi xisarê nerm, 32 hezar û 652 awanîyî xerîpîyayî. Qezaya Rezanî ya (Baglar) de xeripnayîşê nizdîyê 80 awanîyan temam bî û erdlerzî de ziraro tewr gird dîbî. Xebata rijnayîşî herême de hema zî dewam kena. Bi lezkî rijnayîşê awanîyê ke ganî bêrî rijnayîş dest pêkerd, la ame dîyîş ke wexto ke xebate dewam kena selahîyetdarî tedbîran nêgênê û goş nêdanê asayîşê şar û karkeran. 

 

Tutê binê awanîyanê xeripnayeyan de kay kenê

 

Tedbîrê ke dormeyê awanîyê ke yenê rijnayîş de nînê girewtiş vera ters virazîyeno. Dormeyê awanîyê ke ameyî vengkerdiş de tedbîrê tesîrin nînê girewtiş, wextê rijnayîşî de seba hemwelatijê ke derbaz benê, seba tutê ke nê awanîyan de kay kenê û seba karkeran dormeyêk bi asayîş çin o. Vîdeoyê rijnayîşê bêtedbîrî kewtî kamerayanê ma.