SÊRT - Şewatê ke deûdorê dewa Xelîkan ê qezaya Hawelê vejîyabî bi xo tefîya û dîmenan de zî ame vînayîş ke hîn cayî bi hawayêkê xêzkerde ameyê veşnayîş. Eynî wextî de herême de bi destê qorîcîyan birnayîşê daran zî dewam keno.

 

Dewa Xelîkan ê qezaya Hawelî ya Sêrtî de şewatê ke 14ê Tebaxe de vejîya û di rojan dewam kerd bi xo tefîya. Goreyê agahîyê ke dewijan ra ame girewtiş, şewato ke roja ewilî ra vejîya dima îtfaîye ameya la bi sebebê “rayîr çin o” şewat nêtefênayê. Şewato ke roja ewilî ra heta şan de dewam kerd, dima ra bi xo tefîya. Sewbîna ame vatiş ke şewat roja diyîne herême de reyna dest pêkerdo û bi xo tefîyayo. Şewato ke di rojan dewam kerd û bi xo tefîya, herêmê nêzdîyê 10 km vila bîyo.

 

Heto bîn ra zî ame zanayîş ke herême cayê “herêma qedexe” bîye û sebebê vejîyayîşê şewatî nêame zanayîş. Heto bîn ra dîmenan de zî ame vînayîş ke hîn cayî bi hawayêk xêzkerde ameyê veşnayîş.

 

Goreyê zanayîşê ke ameyê girewtiş, qorîcî Qereqola Cendirmeyan ê Ziyaretî ra destûr gênê û derûdorê dewa Xelîkan de daran birnenê û birnayîşê daran herême de dewam keno.