Mîdye Miqted

 

HELEB - Cinîyê Helebî yê ke reaksîyon mojnayî hêrişanê dewleta tirke û roja newera gandarbîyayîşî pîroz kerdî, vatî: “Seba ma ke ma nêverdî dewleta faşîst biresa amacê xo ma do canê xo zî feda bikerê. Seba çinîkerdişê dagirkerî û faşîzmî do îradeyê ma çinî nêbo. Ma do bi îradeyê xo yê xurt vera hêrişanê de vinderî. Bi îrade û îradeyê xo yê xurt ma do Rayberê xo zî azad bikerî." 

 

Hêrişê dewleta tirke yê serê Rojawanê Kurdistan-Bakur û Rojhelatê Sûrîye dewam keno. Vera nê hêrişan de têkoşîn û xoverdayîşê hemwelatijan zî dewam keno. Cinîyê Helebî ke tewrê şahîya roja newera gandarbîyayîşî bîyî, reaksîyon û nêrazîbîyayîşê xo yê vera hêrişan mojna û wina vatî: “Do her serkewtiş para şervananê ma bo.”

 

 'Bi wesîleya hemleye ma ser kewtî' 

 

Dayîka şervanê azadîya Kurdistanî ya bi nameyê Ewaş Mihemedî wiha dest bi qiseykerdişê xo kerd: “Serê nameyê dayîkê gerîlayan hemleya 15ê Tebaxe şarê Kurd û Rayberê PKKyî Abdullah Ocalan û şervananê azadîya Kurdistanî rê pîroz kena. Bi wesîleya qehremantîya şehîd Egîdî ewro ma resayî na roje.”

 

 'Dewleta tirke bi çekê qedexekerdeyan hêrişê şervananê ma kena' 

 

Dewamê qiseykerdişê xo de Ewaşê bale ant serê dewamkerdişê hêrişanê dewleta tirke yê vera şervananê azadîya Kurdistanî û nê çîyan vat: “Ewro reyna dewleta tirke ya dagirker hêrişê herêmê pawitişê medya kena, hêrişê xo yê her tewirî dewam kena. Bi çekê kîmyewî hêriş kena û wazena şervanê azadîya Kurdistanî çinî bikera. Vera şixulnayîşê çekê kîmyewî û qedexekerde yê dewleta tirke, dewletê mîyanneteweyî bêveng manenî û reaksîyonê xo nêmojnenî ke vernîya nê hêrişan bêra girewtiş.”

 

 'Seba şervanan çi destê ma ra bêro ma hadre yî’

 

Peynîya qiseykerdişê xo de Ewaşê sozê paştîdayîşê şervananê azadîye da û vat: “Bi hemleya 15ê Tebaxe bi hezaran kêna û xortê ma tewrê safanê gerîla bîyî. Seba pawitişê herr û ercê xo lajê mi zî tewrê sefanê şervananê azadîya Kurdistanî bî. Coka ra ma her tim paştîya kêna û xortanê xo de yî û seba şervanan çi destê ma ra bêro ma hadre yî. Do her serkewtiş para şervananê ma bibo.”

 

 'Seba ke na hemle çinî bikerî hêriş kenî’ 

 

Derheqê eynî babete de Nayle Nasroye zî ajansê ma rê qisey kerd û vat: “Ma sere de 15ê Tebaxe Rayberê Şarê Kurd Abdullah Ocalanî rê pîroz kenî. Eynî wext de ma ewro hêrişanê dewleta tirke yê serê şervananê azadîya Kurdistanî, şermizar kenê. Seba ke hemleya 15ê Tebaxe ke bî gandarbîyayîşê şarê kurd û bi hezaran domananê ma nê semedî ra tewrê têkoşînî bîyî, çinî bikerî hêriş kenî.” 'Ma do Rayberê xo zî azad bikerî' Nayleye qiseykerdişê xo yê peyênan de nê çîyan ard ziwan ser: “Seba ma ke ma nêverdî dewleta faşîst biresa amacê xo ma do canê xo zî feda bikerî. Seba çinîkerdişê dagirkerî û faşîzmî do îradeyê ma çinî nêbo. Ma do bi îradeyê xo yê xurt vera hêrişanê de vinderî. Bi îrade û îradeyê xo yê xurt ma do Rayberê xo zî azad bikerê."