Rozerîn Gultekîn

 

STENBOL - Femînîst aktivîst û roşnvîra sîyasetî Yasemin Ozgune derheqê têkoşînê cinî û hêrişê ke xorî benê de ercnayîş kerd û vat: “Têkoşînê cinîya kurd bi serran o tesîrêk gird serê komelî de keno. Cinî pîya eşkenê xeylê çîyan bikerê. Çîyê ke cinî yenê têkişt û eşkenê bikerê ra tersenê. Têkoşînê cinîyan ra tersenê. La heta ke cinî azad nêba komel zî azad nêbeno.” 

 

Têkoşîn û serewedarnayîşê cinîyan ê vera hêrişanê serê têkoşînê azadîye her cayê dinya de vila beno. Têkoşînê cinîyan bi sloganê "Jin jiyan azadî" vilayê her cayê dinya bî. Seba ke cinîyî vindertişê xo ra tavîz bidê zî hêrişê îqtîdarî dewam kenê. Verê cû Peymana Stenbolî kerdî hedef, nika zî qanûnê 6284î. Bi nê hêrişan vera destkewtişê cinîyan de zî hêriş dewam keno. Femînîst aktivîst û roşnvîra sîyasetî Yasemin Ozgune derheqê têkoşînê cinî û hêrişê xorî ke dewam kenê de ercnayîş kerd.

 

'Jin jiyan azadî vatişêk bi sêhr o ' 

 

Yasemîne dîyar kerd ke têkoşînê cinîye bi sloganê "Jin jiyan azadî" vilayê her cayê dinya bî û wina vat: “Hetê otorîteya Jîna Emînîye ke ameye qetilkerdiş beden û nasnameyê cinîye timî bena hedef. La serewedarnayîşê cinîye vera înan hêrişan de cewabêk o. hem Tirkîya hem zî Îran bi hêrişê serê cinîye yê serê LGBT+ wazenê îqtîdarê xo serê payan de biverdê. Şexsê Jîna Emînîye de têkoşînê azadîye dest pêkerd. Heta ke cinî azad nêba do komel zî azad nêbo. Coka ra Jin jiyan azadî vatişêk bi sêhr o. Çîyo ke wayîrvejîyayîşê ci virazîya şorişê cinîye bî.”

 

‘Çîyê ke cinî yenê têkişt û eşkenê bikerê ra tersenê’

 

Yasemîne da zanayîş ke seba ke rizgarîyêk pê bêro ganî cinîye têkoşînê hempar bida û wina vat: “Xeylê cayê dinya de cinîye bi sloganê 'Jin jiyan azadî' ameyî têkişt. Tîfaqê cinîye têkoşînê cinîye gird keno. Têkoşînê azadîye yê cinîye Îranî tesîrêk gird ma ser de viraşt. Têkoşînê cinîyê kurd bi serran tesîrêk gird serê dinya de kerd. Cinîyî pîya eşkenê xeylê çîyan bikerê. Çîyê ke cinî yenê têkişt û eşkenê bikerê ra tersenê. Têkoşînê cinîyan ra tersenê” 

 

'Dewamîya zîhnîyetê patrîarkal ê camêrdî' 

 

Yasemîne ard ziwan ke vera têkoşînê cinîye ke beno gird de ‘çetebîyayîşê camêrdî’ yeno awankerdiş û wina dewam kerd: “Eno çeteyê bi vatişê îqtîdarî ke keweno mîyanê têgêrayîşî û hêrişê destkewtişê cinîyan keno. Camêrd qet mexdur nîyo. Wexto ke Peymana Stenbolî estbî zî seba ke nêkewo dewre çi destê înan ra ameyêne kerdêne. Nika zî qanûnê 6284î hedef de yo. No zî parçeyêk hêrişê vera cinîye yo. Problemê feqîrîye îqtîdarî de nêvînenê nafaqa de vînenê. No dewamîya zîhnîyetê patrîarkal ê camêrdî yo.”

 

'Cinîye qet ê xo ra nêameyî war’ 

 

Yasemîne da zanayîş ke her raşteyî de vera îqtîdarîyê AKP-MHPyî de xover dayî û wina vat: “Cinîye vera zextan, vera qedexekerdişê kurtaj, vera astengkerdişê wendişê tutanê kênayan de raşteyan de bî. Cînîyan qet nê çîyî qebul nêkerdî. Prosesê bêvengkerdişê muxalîfan de zî cinîyan vengê xo berz kerd. Bi paştîdayîşî têkoşîn dayî rayraberdiş. Polîtîkaya înan ê çinîkerdişê cinîyan qet ser nêkewt. Cinîye qet ê xo ra nêameye war.” 

 

'Cinîye wexto ke kardî resena este de bi cesaret têkoşîn dana’ 

 

Yasemîne dîyar kerd ke do têkoşînê hempar ê cinîyan her roje gird bena û vat: “Cinî heta ke biresa azadîya xo do bi sloganê 'Jin jiyan azadî' raşteyan de ba. Agêrayîşê nê rayîrî çin o. Heta zextê serê beden û keda cinîye dewam bikera mumkun nîyo ke komel de ma biresê asanîye. Bi raşte ra wedaritişê rejîmê tedaye do rizgarîya komelî pê bêro. Cinîye wexto ke kardî resena este de bi cesaret têkoşîn dana.”