Nûjin Nazlican Yildiz

 

WAN - Vizêr şan de saetê ereyê şanî de ame vînayîş ke fabrîkaya çîmentoyî pêro çopê xo erzena Gola Wanî ya ke bi tehlukeyê pîlî yê lêşînî reyde rî bi rî ya.

 

Seba germê globalî, îşxalkerdişê qeraxê Gola  Wanî, ocaxê kerrayî yê derûdorê Gola Wanî, ocaxê madenan, projeyê hetê qayûman ra ameyê tesdîqkerdiş, zuwakerdişê çirrê bi desan hektaran, nika Gola Wanî bi çinbîyayîşî reyde rî bi rî ya. Demê peyîn de Gola Wanî seba lêşînî û antişê awe ci rojeve de ya.

 

Fabrîkaya Çîmentoyî ya Wanî 1969ine heta nika Artemêtê Wanî de faliyet kena. 2009ine de dewrê Koma Aşkaleyî amebî kerdiş. Na fabrîkaya ke nêzdîyê 53 serrî yo verê qeraxê gole de texrîbatêk pîl viraşta û na rey zî ame vînayîş ke çopê xo erzena gole. Saeta 21.00-22.00ine de ajansê ma dîmenê eştişê çopî yê fabrîka girewt. Demo ke fabrîka çopê xo erzena, gole de dîmenêk bi rengê zerdî vejêna werte. Sewbîna nê çopî boyêke giran derûdor de zî vila kenê.

 

Nêame zanayîş ke fîltreyê çop û hewayî yenê kontrolkerdiş yan nê

 

Na fabrîka roja ke awan bîya, zirarêk pîl dana Gola Wanî. No qanûn zî binpay keno. Ganî fabrîka tewr tay 150 metreyî dûrê qeraxê gole de biba. Nêame zanayîş ke  fîltreyê çop û hewayî yenê kontrolkerdiş yan nê.

 

Qeyûm eştişê çopan nêvînaye yeno

 

Qeyûm derheqê lêşînî û îşxalkerdişê qeraxê Gola Wanî de tu xebatan nêkeno. Aşma vîyarte de festîvala bi nameyê "Danasnayîşê Gola Wanî ya bi Dinya reyde" organîze kerd. Labelê bi nê festîvalî a lêşînî nêameye vînayîş. Festîval de reyna gole lêşîn kerdî û komeleyê derûdorê bi rayaumumî reyde reaksîyon vera nê mojnayî.