MANÎSA - Cinîyê Manîsayî rojane bi 400 TL mîyanê erdan de şuxulênê, çîyê ke ciwîyayî qalî kerdî.

 

Bi ameyîşê hamnanî reyde karkerê mewsimî erdan de dest bi xebate kerdî. Ramitişê firingîyan, eşêfe, ramitişê şitlan, pakkerdişê erdan û karê bêasayîşî hetê camêrdan ra zêde nîno tercîhkerdiş û xeylê xebatkarê mîyanê erdan cinî yê. Yew bajarê ke karkerê ramitişî ci de zêdeyê Manîsa yo.

 

Cinîyê ke rojane bi 400 TL şuxulênê, saetê serê sibayî rew wurzenê û heta saetê tewr germî yê roje de mîyanê erdan de xebityenê. Cinîyan çîyê ke ciwîyenê û binpaykerdişê kede qal kerdî.

 

Cinî yenê şuxulnayîş

 

Cinîya bi nameyê Gulîzar Tozan da zanayîş ke şefeqê sibayî saete 05.00ine de wurzenê û heta 14.00ine bi 400 TL şuxulênê û wina vat: “Karê arêdayîşê firîngîyan cinî kenê. Camêrdî fabrîkayan de bi sîgorta şuxulênê. Yanî cinî bê sîgorta şuxulênê. Têduştî çin a. Cinî hem keye de û hem zî mîyanê erdî de şuxulênê. Ez seba cinîyan azadî wazena. Wa cinî bişuxulîyê û serê payanê xo de vinderê."

 

‘Camêrdî karê keyeyî nêkenê'

 

Cinîyan bi nameyê Şare (Şadiye) Tozan zî wina vat: "Bi 30 serrî yo mîyanê erdan de şuxulêna. Ez her karî de şuxulîyaya. Ez şina keye na rey karê keyeyî kena. Heta 2yê şewe şuxulêna. Camêrdî înşatan de şuxulênê. Yenê keye vanê ma rincan bîyê. Vanê no karê cinîyan o. Qey cuye wina bena? Keyeyê mi Mêrdîn ra koçê Manîsa kerdo. Seba nê ma bi ramitişî reyde eleqedar benê. Ma vêşan nîyê, werrekna wareyê ma bibayîne. Tîya ne herra ma esta ne zî keyeyê ma. Sîgorta zî çin a."

 

‘Pêro bar serê milê cinîyan de yo’

 

Cinîya bi nameyê Remzîye Aydemîr zî dîyar kerd ke 10 serrî yo ameyê Manîsa û wina vat: “Wexto ke ma newe ameyî, ma kone de bî. Dima ra ma keye kîra kerd. Ma dest bi karkerîya ramitişî kerd. Kone de awe çinbî. Cinîyan zehmetîyê girdî antêne. Mi waştêne ke ma bajarê xo de biciwîyê. La seba karî ma mecbûr mendî koç bikerê. Ma tîya 4 keyeyî kîra de yê. Debare zaf zehmet bîye."

 

‘Ramitişî de yê ke qezenc kenê wayîrê fabrîkayê’

 

Semîray Tarçin zî dîyar kerd ke debare zah zehmet bîya û seba şîyayeyê tutanê xo mîyanê erdî de şuxulêna û vat: "Wexto ke mekteb abibo, pere qîm nêkeno. Ma kredî danê. Tîya wayîrê erdî zî qezenc nêkenê. Her çî vaye bîyo. Ma mîyanê erdî de 8 saetî zêdeyêr şuxulênê. Ma tutanê xo yê qijan xo reyde anê mîyanê erdî. Ma tîya perîşan benê."