Rojda Aydin

 

WAN - Avûkata Bûroyê Huqûqî ya Asrinî Raziye Ozturk, dîyar kerd ke tecrîd dewamê komployê mîyanneteweyî yo û hemverê komployî ganî têkoşînêk pîl bêro dayîş. 

 

Rayberê PKKyî Abdullah Ocalan ke 15ê Sibata 1999ine de bi komployêk mîyanneteweyî teslîmê Tirkîya ame kerdiş û ê wextî ra tepîya Girawa Îmraliyî de tecrîdêk kûr yeno rayraberdiş. Avûkatê Bûroyê Huqûqî yê Asrinî tewr peyîn 7ê Tebaxa 2019ine de bi Abdullah Ocalanî reyde pêvînayîş kerdibî û ê wextî ra tepîya seba pêvînayîş bikerê xeylêk rey muracat kerdî û nê muracatî bêcewab mendî. Eynî wextî de serra 2023ine de vejîya werte ke tarîxê ci nêameyo dîyarkerdiş de seba Abdullah Ocalanî di rey cezaya dîsîplînî ameya dayîş.

 

Avûkata Bûroyê Huqûqî ya Asrinî Raziye Ozturk, derheqê tecrîdo ke her ke şino giran beno de qisey kerd.

 

‘Girawa Îmraliyî de prosedurêk şexsî yeno rayraberdiş’

 

Raziye, ard ziwan ke ê sey avûkatê Abdullah Ocalanî her hewte di rey û keye zî rojêke hem muracatê Serdozgerîya Komara Bûrsayî û hem zî Midûriyetê Zîndanê Girawa Îmraliyî kenê û vat: “Girawa Îmraliyî de destûr nîno dayîş ke pêvînayîşê keye û avûkatan pê bêro. Derheqê nê de Midûriyetê Zîndanê Girawe tu cewab nêdano ma. No prosedur bi xususî şexsê Girawa Îmraliyî de yeno rayraberdiş. Ma sey avûkatî wayîrê nê heqî yê ke eşkenê bi mûwekîlê xo reyde pêvînayîş bikerê. La zîndanê Îmraliyî de prosedurêk ameyo dîyarkerdiş û hemverê nê prosedûrî ma mecbûr ê muracatê dozgerîye bikerê. La ma hem dozgerî û hem zî midûriyetî rê nê muracatî kenê. Heta nika hemverê nê muracatan de tu cewabêk ma nêgirewto. Derheqê mûwekîlê ma de cezaya dîsîplînî esta çin a ma wexto ke dadgerîyê înfazî rê muracat kenê musenê. Reyan zî ma derheqê muhtewayî de agahî gênê.”

 

‘Qedexeyêk fîîlî esto’

 

Raziye, dîyar kerd ke cezaya disîplînî û qedexeyê pêvînayîşî yê bi avûkatan reyde yeno astengkerdiş huqûqî nîyo û vat demê muracatî pêvînayîş kenê û musenê ke cezaya disîplînî mûwekîlan ameya birnayîş, sewbîna nêeşkenê xo biresenê tu agahîyêke zelal. Raziye, bale ant serêmraporê CPT yê 2019ine û wina vat: “Bi nê raporî cezaya disîplînî yê heta 2019ine ma bi hawayî musayî. Nînan ra yew zî  mûwekîlê ma ke wayîrê heqê sporî yê, seba hîn heqî, seba sporî û tay zî seba voltayî visnayê. CPT raporê xo de dîyar kerd ke sebebê Tirkîya yê nê cezayê dîsîplînî, xapênayîş o. Seba qedexeyê avûkatan bibo, ganî hetê qanûnî de pêvînayîşêk bibo. Labelê ma tebaxa 2019ine ra mûwekîlanê xo ra tu agahî nêgînê û ma nêeşkenê pêvînayîş bikerê. Tenê qedexeyêk fîîlî esto.”

 

‘Ganî Tirkîya bêra teşhîrkerdiş’

 

Raziye, dîyar kerd ke CPT parçeyêk sazgehê mîyannetweyî yo û vat, Tirkîya zî dewletêke girêdayeyê Konseya Ewropayî ya. Raziye vat, seba nê çî dewlete û sazgehê girêdayeyê ci dewlete zî pîya pawenê û wina vat: “Mîsyonê CPT vernîgirewtişê hemverê îşkenceyî yo. CPT raporê xo de zî vatibi ke Zîndanê Îmraliyî de îşkence esto û na rewşe nîna başkerdiş. Seke yeno zanayîş serra 2019ine de pêvînayîşê avûkat û keyeyan pê amebi. O wext CPTyî teqwîm dabi vernîya Tirkîya. Hetê pêvînayîşê avûkat û keyeyan de, cezaya disîplînî yê xapênayîşî yê û no qerar netîceyê amancê sîyasî de ameyo dayîş, amebi tespîtkerdiş. Na çarçewa de raporêk vejîyabi werte. Dimayê 2019ine yanî pêvînayîşê tewr peyîn yê avûkatan dima rewşa zîndanî Girawa Îmraliyî zêdeyêr giran bî. No çî belgeyê ke ma CPT rê şirawitibi de ca gêno. Dewleta terefgire ke pêşnîyazîyê CPT bi ca nêard, ganî caardişêk pê bîyaro. No caardiş çî yo? Na rewşe eşkena teşhîr bikera û rayaumûmî rê bêro parekerdiş. Tirkîya ke  pêşnîyazîyê CPT pê nêana, ganî bêra teşhîrkerdiş. Xêrcê nê zî rewşa Konseya Ewropayî zî esta. Wexto ke merdim ewnîyeno ci ra mekanîzmayê kontrolî estê. Labelê no çî Zîndanê Girawa Îmraliyî rê tu wext derbazdar nêbîyo. Tu sazgehê xoser nêeşkayî şêrê  Girawa Îmraliyî. Hetê sazgehê mîyanneteweyî de nê çî bi tenê CPT eşkeno bikero. Seba nê şîyayîşê CPTyî girawe û parekerdişê raporan seba ma xeylêk muhîm o.”

 

Girawa Îmraliyî û zîndanê bînî

 

Raziye, bale ant serê binpaykerdişê heqê tepişteyan ê zîndananê bînan û vat hemverê tepiştişê Abdullah Ocalanî ê Girawa Îmraliyî de tu kesî veng nêvet û wina vat: “Ê wextî de hemverê Zîndananê Tîpê Fyî de têkoşînêk pîl estbî. La seba 1999ine de hemverê kesan zîndanê şexsî pê ameyî û wareyê komelî de şikinayîşêk pê ard. Têkoşîn hêdî hêdî da vindarnayîş û zîndanê tîpê F, viraşt. Caardişê cezaya heta hetayî zî bi Birêz Ocalanî reyde ameye. Birêz Ocalan seba ke sembolê şarê kurdî yo no çî serê ey de ame ceribnayîş. Seba veng zêde nêame vetiş û têkoşînêk pîl nêame rayraberdiş no çî pêro zîndanê Tirkîya û Kurdistinî de vila bi.”

 

‘Veşnayîşê înfazan dewamê tecrîdî yo’

 

Avûkate Raziye, dîyar kerd ke rejîmê înfazî yê girankerde ke serê Abdullah Ocalan û serê di mûwekîlê bînî yenê caardiş, bi qerarê Dadgeha Heqê Merdiman ê Ewropayî ra ame tespîtkerdiş ke îşkence yo û vat: “La na rewşa îşkenceyî serra 2014ine de ameya tespîtkerdiş û ê wextî ra nata hemverê rejîmê înfazî yê girankerde de tu başkerdiş nîno kerdiş. Ewro xeylêk tepişteyî binê nameyê rejîmê înfazî yê giran de yenê tepiştiş. Pêro heqê xo ra ameyê dûrvistiş û hûcreyê yew kesî de yenê tepiştiş. Bi tenê saetêke heqê hewa girewtişî danê. Xeylêk nimûneyê bi nê rengî estê. Seba nê zî hemverê rewşa Girawa Îmraliyî vengêk baş nêvejîya, no pêro zîndanê bînî rê vila bîyo. Veşnayîşê înfazan zî dewamê nê yo.”

 

Tespîtê Abdullah Ocalanî yê serê Peymana Lozanî 

 

Raziye, peynîya qiseykerdişê xo de bale ant serê Peymana Lozanî û fikrê Abdullah Ocalanî yê serê nê de û wina qedêna: “Birêz Ocalan serê Peymana Lozanî verê zî tespîtê pîlî kerdo. Birêz Ocalan tarîxê kurdan bi temamî girewto dest û munaqeşe kerdo. Seba ma bo çimeyê dewlemend û paradîgmayêke esta. Na paradîgma, paradîgmaya azadiya cinî û paradîgmayêke ekolojîk a. Hetê îdolojiyî de paradîgmayêke pêro komelî azad bikera ya. Seba peynîya nê şerî bêro û na paradîgma pê bêro, ganî Birêz Ocalan azad bibo, no bi nê mumkin o. Vengêk ke ma ci ra bieşnawê do nê problemî çareser bikero. Wexto ke bi Birêz Ocalanî reyde pêvînayîş ameyîne kerdiş, aramîyêke estbî û fikrê ey mîyanê komelî de bî sebebê hêvîyêke pîl. La dimayê ke pêvînayîş bi Birêz Ocalanî reyde peynî bî, şer zî reyke bîn destpê kerd. Xora tecrît zî seba nê esto. No tecrît seba hêzê ke şer wazenê pê yeno.”