Elfazî Toral

 

STENBOL - Roniştoxê Stenbolî bale antî serê vayî û krîzê ekonomîye û vatî: “Welat de têduştîyê ameyîşî nêmendo. Ma êdî nêeşkenê debara xo bikerê û biciwîyê.” 

 

Seba polîtîkayê şerî yê îqtîdarê AKP-MHPyî krîzê  ekonomîye her ke şino kûr beno û şar ver bi feqîrî de şino. Her rojî çî vaye benê û marketan de etîketî vuryayî. Vayî ra pêro beşê komelî bi tesîr benê. Her roja ke derbaz bena zî qesawetê welatijan gird beno.

 

Stenbol de welatijî ajansê ma JINNEWSî rê qisey kerdî û bale antî serê rewşa xo ya ekonomî. 

 

‘Welat de têduştîya ameyîşî çin o’ 

 

Emîne Çakici bi meaşê teqawitbîyayîşî debara xo kena û wina vana: “Ma êdî nêeşkenê debara xo bikerê. Meaşê teqawîtbîyayîşî xeylêk kêm o û her çî zî xeylêk vay o. Keye de ma 3 kesî yê û bi nê meaşî ma îdareyê xo kenê. Ez şina market la nêeşkena çîyêk bigîrî. Ma nêeşkenê vejîyê teber û ma keye de ronişnenê. Ma nêeşkenê kitabêk zî bigîrê. Nika vayîya fatûrayê ceyran, gazê xoza, awe û sewbîna kîra zêde ya. Welat de têduştîya ameyîşê çin o. Dewlemendî tewr dewlemend benê û feqîrî zî tewr feqîr benê.”

 

‘Wexto ke şuxulêna ez nêeşkena şêrî unîversîta’ 

 

Meltem Oksuz seba unîversîta ameya Stenbol qiseykerdişê xo de wina bale ancena: “Ez Stenbol de xeylêk zehmetîyan ancena. Cayê ke ez ci de bimanî çin o. Ez yurd de mendêne û mi bursê xo dayîne yurd. Nika mecbûrî ez verê merdimanê xo de manena. Nifûsa înan zî qelebalix a û şert û mercê nêbaş de ciwîyenê. Ez wazena xo rê keyeyêk bigîrî la îmkanê min ê ekonomîye çin ê. Ez wazena hem biwanî û hem zî bişuxulî. La ez nêeşkena herdiyan pîya bikerî. Wexto ke şuxulêna nêeşkena şêrî mekteb, wexto ke şina mekteb zî nêeşkena debara xo bikerî. Ez xeylêk reyan nêeşkena kitaban zî bigîrî.”

 

‘Krîz tesîrê temamê cuye keno’

 

Elîf Kiliç zî wendekar a û derheqê krîzî de wina vat:  “Tirkîya de nika krîzê ekonomî esto û her ke şino zî kûr beno. Welatijî êdî vurnayîş wazenê labelê pê nîno. Ez nika tenê eşkena hewcedarîyê xo yê lazimî bikerî la pereyê mi nê rê zî qîm nêkeno. Çinbîyayîşêk wina esto ke ez êdî nêeşkena xeyal zî bikerî. Qabiliyetê ma ezto la krîzê ekonomî hemverê nê de beno asteng. Ma nêeşkenê xo rê kitabêk zî bigîrê. Êdî sey luksêk aseno. Ganî çareserîyêk bêro vînayîş. Ganî kesê ke polîtîkayê krîzî rayîr ra benê, bêrê vurnayîş. Krîzê ekonomî tesîr serê pêro cuye de keno.

 

‘Krîzê ekonomîye ra êdî vajê bes o’ 

 

Gullu Taş zî vat krîzê ekonomî sere de Tirkîya û xeylêk dewletê bînan de zî babeta sereke yo û wina vat: “Her roje vayîya her çî zêde bena. Nika bazarêk xoser esto û her kes goreyê xo vayîye keno. Ganî sere de hemverê nê de vinderê. Kolayêke bîya 60, gelo çîyêk wina beno? Berardiş de êdî xeylêk qels o, citkar êdî nêeşkenê berardiş bikerê. Nêeşkenê toxim bigîrê, nêeşkenê cite bikerê û mazot vay o. Wexto ke nê şîyayeyê xo vejeno, mecbûr maneno ke vay zî biroşo. Ganî  krîzê ekonomî rê edî vajê bes o. Beno ke peynîya ma bişibo Macarîstan û ameyoxê ma do tehluke de bibo.”