ŞIRNEX - Hemsereka HDPyî Sabuha Akdage tecrîdo ke serê Rayberê PKKyî Abdullah Ocalanî de yeno rayraberdiş û no 29 aşmî yo ke ci ra tu xeberêk nîna girewtiş, ercnaye û wina vat: “Tecrîd tena rayberîye ser de sînorkerde nîyo. Vîşêrê zîndanan serê komel û fikrî de zî tecrîd vila beno.” 

 

Rayberê PKKyî Abdullah Ocalan Zîndanê Tîpê Fyî yê Asayîşo Berz ê Îmraliyî de binê şert û mercê giran ê tecrîdî de yeno tepiştiş û 29 aşmî yo ke tu malumat ci ra nîno girewtiş. Tecrîdo ke serê Rayberê PKKyî Abdullah Ocalanî de yeno rayraberdiş, her ke şino xorî beno. Wexto ke tecrîd dewam keno na game de serê xozaya Kurdistanî de zî hêriş pê yeno. Hemsereka Partîya Demokratîke ya Şaran (HDP) Sabuha Akdage şewatê dar û daristanê Koyê Cûdîye girê da tecrîdê serê Abdullah Ocalanî ke yeno rayraberdiş û wina vat: “Paradîgmaya ma de pawitişê cinî, kultur, ziwan û xozaye esto. No paradîgma zî bi destê serekatîye ame awankerdiş. Coka ra zî tecrîdo ke serê serekatîye de yeno rayraberdiş heme hetan ra komelî tesîr keno.” 

 

‘Dewleta tirke wazena şarê kurdî bifetisna’  

 

Hemsereka Partîya Demokratîke ya Şaran (HDP) Sabuha Akdage ard ziwan ke no tecrîdo ke demêk dergo ke serê Rayberê PKKyî  Abdullah Ocalanî de yeno rayraberdiş, Kurdistan û Tirkîya de vila bîyo. Sabuhaye da zanayîş ke dewleta tirke wazena şarê kurdî bifetisna û wina dewam kerd: “Dewleta tirke wazena şarê kurdî rayberê xo ra tu xeberêk nêgêro. No domnayîşê tecrîdî yê serê şarê kurdî tesîrêk gird virazeno. No tecrîd vilayê zîndanan zî bîyo. Nika embazê ma yê zîndanî zî binê tecrîdî de yî. Embazanê ma yê zîndanan ser de bi cezaya rêzkarî, bi kuyayîş, bi veşênayîşê înfazî no tecrîd vila beno. Tena rayberîye ser de sînorkerde nîyo. Vîşêrê zîndana serê fikir û komelî de zî no tecrîd vila bîyo. Şarê kurd serê rayîrê xo yê heqîqetî ra nêagêreno, la no tecrîd xorî û vilayê her hetî bîyo. Serê komelî de zî tesîr virazeno û nêverdeno ke averşîyayîş bibo.” 

 

‘Seba şikitişê tecrîdî yewî ferz o’ 

 

Sabuhaye dewamê qiseykerdişê xo de ard ziwan ke tecrîd bi polîtîkaya şerê taybet vejîya raşte û problemê cinî, komel, kulturî girêdayeyê tecrîdî yo. Sabuhaye da zanayîş ke no tecrîdo bêhuqûqî ke peynî nêbeno binpaykerdişê qanûnî yo. Sabuhaye wina vat: “Seba ke babete kurd î û rayberîyê kurdî o, nêwazenê çareserî bêra dîyîş û şarê kurd aver şêro. Peymana Lozanîzî girêdayeyê nê çîyî yo. Komxebata Lozanî de derheqê şarê kurdî de mesajêk xurt ame dayîş. Seba şikitişê tecrîdê serê rayberî û averşîyayîşê şarê kurdî, ganî ma çar parçeyê Kurdistanî de yewîya xo awan bikerî.” 

 

‘Cîyayîya reaksîyonê Cûdî û Akbelenî netîceyê  tecrîdî yo’  

 

Sabuha dîyar kerd ke seba şikinayîşê tecrîdî ganî bi paştdayîşê şarê bînan rê veng bêro vetiş. Sabuha da zanayîş ke no tecrîd serê her hetê kurdan de tesîr keno û wina vat: “Paradigmayê ma de pawitişê cinî, kultur, ziwan û xoza esto. No paradîgma zî bi destê serekîye ame awankerdiş. Seba nê zî tecrîdê serê serekî de yeno rayraberdiş, serê pêro hetê komelî de tesîr keno. Eke cîyayî bikewo mîyanê şewatê Cûdî û talankerdişê Akbelenî û mudaxaleyê seba şewatê Cûdî bêrê astengkerdiş, yeno manayêke kûrkerdişê tecrîdî."  

 

‘Xozaya Kurdistanî bi tenê yena verdayîş’  

 

Sabuha dîyar kerd ke xozaya Kurdistanî bi tenê yena verdayîş û no zî giredayeyê tecrîdî yo. Sabuha vatişê xo wina peynî kerd: “Na bêvengîya Akbelenî û bêvengîya Cûdî mojnena ke no tecrîdê serê xozaye yo. Lazim o ke ma vernîya nê padê û seba pêro cayan eynî reaksîyonî ramojnê.”