Şehrîban Aslan

 

ENQERE - Parlamentera Partîya Çep a Keske Dîlan Kunt Ayan derheqê tecrîdê giran ê serê Rayberê PKKyî Abdullah Ocalan de qisey kerd û vat: “Pêwa ke tecrîdê serê Birêz Ocalanî sûcê merdimayîye yo, eynî wextî de padayîşê pêro rayîr û kanalê pêvînayîşî û diyalogî yo. Israrê şerî de feyde nêdano tu kesî.”

 

Rayberê PKKyî Abdullah Ocalan ke 15ê Sibata 1999ine heta nika binê tecrîdê giran de yeno girewtiş, 29 aşmî yo tu agahî ci ra nîna girewtiş. Pêvînayîşê avûkatanê Abdullah Ocalanî û tepişteyanê bînan ê Îmraliyî de Omer Hayrî Konar, Veysî Aktaş û Hamîlî Yildirim bi sebebê qedexeyê pêvînayîşî yê avûkatan ê 6 aşmî her rey yeno  astengkerdiş û yê keyeyî zî bahaneyê cezaya dîsîplînî yê hîrê aşmî yenê astengkerdiş. Parlamentera Partîya Çep a Keske ya Rihayî Dîlan Kunt Ayan derheqê tecrîdê giran ê serê Rayberê PKKyî Abdullah Ocalanî de qisey kerd.

 

‘Tecrîd dirîyê dewlete îfşa keno’

 

Dîlane da zanayîş ke tecrîd rewşa somut ê îşkence û îzolasyonî yo û vat: “24 serrî yo Birêz Ocalan tepişte yo. 29 aşmî yo bi tu hawayî agahî ci ra nîna girewtiş. Bêşik avûkat îtîraz kenê la huqûq pê nîno. Pêro heqî çin yenê hesibnayîş. Ma nê tecrîdî, na rewşe her ca de anê ziwan. Tecrîd sûcê merdimayî yo. Komara Tirkîya de tu wext demêk wina nêamebi ciwîyayîş. Tecrîdêk giran esto. Dinya de sîstemêk wina nêameyo vînayîş. Îşkenceyêk babeta vatişî yo. Bi nê  tecrîdî vengê pêro hetan zî yeno birnayîş. Guantanamo heta Israîlî ma wextê wina ra biewnê, no dîrîyê mezgê dewlete û modernîte îfşa keno.”

 

‘Îqtîdar zano eke tecrîd wedarîyo do kurdî boya xo bidê’ 

 

Dîlane dewamê qiseykerdişê xo de wina vat: “Rewşêk redkerdişî ya dişmenîye babeta vatişî ya. Çîyo ke yeno redkerdiş tena derheqê tepişteyan de nîyo. Ganî no bêro resnayîş; rewşa bîyaye de AKP bi hawayêko zelal nêwazeno tecrîdê serê Ocalanî bêro wedaritiş. Îqtîdar zano eke tecrîd wedarîyo do kurdî do boya xo bidê. 24 serrî yo tecrîd pê yeno. Tecrîdêk giran nika Îmraliyî de pê yeno. Prosesê 2011-2015î de şar tay asan bîbî. La nika heme kanalî ameyî girewtiş. Tecrîdê serê heme hetan de tesîr viraşto. Heta ke şer de israr bibo do her kes wina bo.” 

 

‘Wa qanûnê xo pê bîyaro’ 

 

Dîlane vera tecrîdî de bale ant serê muhîmîya rêxistinbîyayîşî û wina dewam kerd: “Binpaykerdişê heqan û bêhuqûqîya ewro ke pê yeno her kes zano. Coka ra ganî her kes prosesî baş biercno. Têgêrayîşê kurdî tena têgêrayîşê xo raşteyê sîyasî de awan nêkerdo. Ganî ma bi vengêk berz nê çîyî bironî raşte. Ma dewlete dawet kenê ke qanûnanê xo pê bîyara.” 

 

‘Ganî rayîrê pêvînayîşî bêrê awankerdiş’ 

 

Dîlane da zanayîş ke israrê şerî feyde nêdano tu kesî û wina peynî ard: “Ganî tecrîd bêro şikitiş û kanalê pêvînayîşî bêrê akerdiş. Tecrîd sucê merdimîye yo. Israrê şerî de feyde nêdano tu kesî. Heta ke şer de israr bibo do ekonomî zî wina bo û merdim zî na rewşe de bibê. Seba aştîyêke daîmî ganî bi lezkî tecrîd bêro şikitiş. CPTyî serra 2018î de raporêk hadre weşanabî. Rapor de şertê teberê huqûqî ameybî tespîtkerdiş û pêşnîyazî seba dewlete ameybî kerdiş. Rapor de eşkera ameybî vatiş ke qedexekerdişê pêvînayîşî bi bahaneyan yeno kerdiş. La ma vanê ke madem no tespît esto qey çîyê ferz yê ke ganî bêrê kerdiş nînê kerdiş. Ganî derheqê babete de gamî bêrê eştiş.”