ŞIRNEX - Roniştişê dewaya Serekê Ocaxê Têgêrayîşê Taybet ê Şirnexî Îbrahîm Barkinî ke Şirnex de Sakîne Kulture bi îşkenceyî kiştbî do siba bêro dîyîş. 

 

Roniştişê 4ine yê dewaya Serekê Ocaxê Têgêrayîşê Taybet ê Şirnexî Îbrahîm Barkinî ke 13ê gulana 2022yî de bajarokê Tilqebînî ya qezaya Silopî ya Şirnex de Sakîne Kulture bi îşkenceyî kiştbî do siba 2ine Mehkemaya Cezaya Girane ya Cizîrî de bêro dîyîş. Roniştişê peynî yê dewaya Îbrahîmî de bi sucdarîya ‘Bi hawayêko biwesf hadreyî kerdo û bi îşkenceyî kişto’ yeno muhakemekerdiş de qerar ameybî dayîş ke qeydê HTSyî bêrê cêgêrayîşkerdiş. 

 

Têkilîya kiştoxî ya bi hêzê paramîlîter û AKPyî reyde  

 

Vejîya raşte ke têkilîya kiştox Îbrahîm Barkinî bi hêzê paramîlîter û selahîyetdarê AKPyî reyde esta û sey personelê raşteyî yê Îdareyê Taybet ê Şirnexî xebetîyeno. Îbrahîmo ke bajar de sey AKPyî yeno naskerdiş, parekerdişê ci yê serê medyaya dîjîtale de fotografê ci yê ke bi Mudirê Şûbeyê Kirarîya Cerdewanan ê Fermandarîya Pêroyî ya Cendirmeyan Albay Seydî Salman, Şaredarê Şûbeyî yê AKPyî Abdûrahman Şeylan, Serekê Ocaxê Osmanîyan ê Şirnexî Hakan Tatar, Midûrê Têkilîyê Komelê Sivîl ê Şirnexî Mustafa Guner û xeylê AKPyîyan reyde anto, esto. 

 

Vejîya raşte ke bado ke Îbrahîm, Sakîneye qetil kerdbî, tacîzê cînsî cinîye kerdbî û bi kiştişî mêrdeyê cinîye tehdîd kerdo. 

 

Kiştox xo eşt îstixbaratî  

 

Kiştox Îbrahîmî, îtiraf kerd ke cenazeya Sakîneye veşênayo û wina vat: “Ez merdimêk girêdayeyê dewlet û miletê xo ya, şima eşkenê nê Midûrîya Polîsan a Silopîya û îstîxbaratî bipersî. Mi ‘rêxistina terorî rê’ sere çewt nêkerd û nêkena zî. Seba ke timî yena tehdîtkerdiş ez kardî xo reyde çarnena.” 

 

Îbrahîmî pawitişê xo yê derheqê pereyo ke erşawîyayo hesabê ci yê bankaye de zî wina vat: “Meqsedê mi no bî ke ez keye û tutanê şehîdan rê hetkarîya gida û kincan bikera. Eynî wext de ma paştîdayîşê tutê ke kewtî mîyanê tîryakî zî kenê.”