Şehrîban Aslan

 

AMED - Endama ÇMOye Nûjîyan Yildirime derheqê şewatê Koyê Cûdîye de qisey kerd û vat: “Bi bahaneyê asayîş û ekonomîye polîtîkayê rantî pê yenî. Seba ke ma nê çîyî qebul nêkenî ganî bi lezkî ma vera şewatê Cûdîyî de bibî veng. Keştîya merdimîye Cûdîye de veşêna." 

 

Raşteyê Gera Mihetê ya dewa Sorbitmê ya ke quntarê koyê Cûdîye ya qezaya Silopî ya Şirnexî de ya, bi rojan o şewat dewam keno. Şewato ke herême de vejîyayo vilayê raşteyêk gird bîyo û çimeyê herême dîyar kerdî ke raşte hetê leşkeran ra ameyo veşênayîş. Cayo ke vêşêno nizdîyê qereqolî yo. Tu mudaxale seba hewnakerdişê şewatî çinî yo û destur nêdîyeno ke hemwelatijî adir hewna bikerî. 

 

Endama Odeya Muhendîsê Dorme (ÇMO) Nûjîyan Yildirime derheqê şewat û qirkerdişê daran de ercnayîş kerd.  

 

‘Bêvengîyêk seserrrî’ 

 

Nujîyane bale ant qirkerdişê daran û şewatê daristanan ser û vat: “Bêvengîya vera qirkerdişê xozaya herême, bêvengîya seserrî ya vera talankerdişê xoza û tarîxî ya. Herême de bi serran o bi hawayêêko sîstematîk vera xozaye de hêriş pê yen, xoza yena qirkerdiş. Vera nê caardişan de şarê herême, pawitoxê dorme û odeya meslekî veng kenî û reaksîyon mojnenê. La reyna zî vengêk zexm nêvejîyeno. Şewat zî nê semedî ra pê yeno. Bahaneyê asayîşî pêşkêşê rayaumûmîye kenî. Nika cudîye de demêk dergo ke şewat esto û qirkerdişê daran esto. Seba menfîetê rantweran darî yenê birnayîş. Vera muracatê suc û gerreyî de rayaumûmîye awan nêbî. Bi bahaneyê asayîşî şarî danê vindertiş.” 

 

‘Qirkerdişê xozaye’  

 

Nûjîyane dewamê qiseykerdişê xo de ard ziwan ke problemê asayîşî netîceyê rijnayîşê xoza û bobelatan de pê yeno û vat: “Polîtîkayê asayîşî vera xozaye qir kenî. Bi hawayêko kêfî û bê sînor texrîb kenî. Nizdîbîyayîşê hêzê asayîşî û selahîyetdaran ê hemverê rijnayîşêxozaye de merheleyêka cidî de ya. Şewatê Koyê Cûdîye sey kêfweşîyêk hetê leşkeran ra yeno antiş û şirawenê keyeyanê xo rê. Netîceyê polîtîkaya ke şîdetî miqate kenî de dîmenê çinîbîyayîşê gandarê xozaye yenê temaşekerdiş.” 

 

‘Hewnakerdişî rê destur nêdanî’ 

 

Nûjîyane dîyar kerd ke tena Cûdî de nê her cayê Kurdistabî de bi destê dewlete adir bi daristanan yeno eştiş û vat: “Akbelenî de zî eynî problem esto. Nêverdenê ke mudaxaleyê şewatî bêro kerdiş. Eynî wext de Akbelenî de rojê peyênan de darî yenê birnayîş. Reaksîyonê vera nê caardişan dewam keno. Şewatê Cûdîye de gandarî yenê çinîkerdiş. Heme gandarî yenê veşênayîş. No bi bahaneyê asayîşî sey polîtîkayêk dewlete dewam keno.” 

 

‘Ganî ma bibî veng’ 

 

Nûjîyane peynîya qiseykerdişê xo de veng daye şarê Kurd û pawitoxê xozaye û vat: “Heme kitabê bimbarekî de yeno vatiş ke Keştîya Nûhî na herême de ya. Na bawerîya bi hezaran serrî de tena merdim nê, heme gandarî ameyî xelisnayîş. Yanî ma heme keştîyêk de yî û ma girêdayeyê yewbînan î. Ganî ma bi lezkî vera qirkerdişê xozaya Cûdîye de bibî yew veng. Cûdî keştîya merdimîye yena veşênayîş.”