Şehrîban Aslan

 

AMED - Feryaz Akşahîna ke Licê de ciwîyena da zanayîş ke bi serran o zehmetîyan ancena û vat: “Her çî vaye bîyo. Ma şinê bazar 200 TL danê tena yew tewre. Vayebîyayîş tena bajaran ser de tesîr nêviraşto, dewijî zî tesîr bîyî." 

 

Krîzê ekonomîye her ke şino giran beno û tesîrêk gird serê heme hetan de kerdo. Cinîya bi nameyê Feryaz Akşahîna ke qezaya Licê ya Amedî de dewa Markê de ciwîyena dîyar kerd ke bi serran verê cû dewa înan ameya vengkerdiş û nika newe ra ameyî dewa xo. 

 

Di serran xeyme de mend 

 

Feryaze da zanayîş ke serra 1993yî de keyeyê înan ameyo veşênayîş û nê semedî ra barê Amedî kerdî û vat: “Krîzê ekonomîye vera ma nêeşkayî kira bidê. Coka ra ma reyna agêrayî dewa xo. Ma ameyî dewe la keye çinî bî. Ma kelepulanê xo kerd mîyanê keyeyê şînî. Ma di serran xeyme de mendî. Nika ma keyeyê xo viraşto. La kêmanî hema estê. Ma kişta keyeyê xo de baxçe viraşt. Ma sebze ronenê.” 

 

‘Ma 200 TL danî yew tewre’ 

 

Feryaze bale ant krîzê ekonomîye ser û wina dewam kerd: “Her çî bîyo vaye. Ma 200 TL danî yew tewre. Kesê ke dewe de ciwîyenê zî krîz ra tesîr bîyî. Verê cû awa ma bê saeate bî. Ameyî saete ronayî ser. Êdî ma pereyê awe zî danê. Ma na cuye ya? Ma nêeşkenê îdareyê xo bikerê. Ez pelê mewan kena bîdonan û bi 200 TLyî roşena. Bi payan şina dewanê bînan û uca de pelê mewe arê dana û bena kişta rayîrî de roşena. Ma nêeşkenê heqê rayîrî bidî ke şêrê bajar.” 

 

Xeylê kesî agêrayî dewe 

 

Feryaze qiseykerdişê xo yê peyênan de dîyar kerd ke heme problemî yew zî û vat: “Ma serra 1993yî de bi zorî ameyî koçkerdiş. Leşkeran dewa ma ser de eştî. Ma keye ra vetî û banê ma veşênayî. Dewijan îşkence kerdî. Tutê ma hema şenik bî. Ma koçber bîyî. Nan çinî bî ma bidî tutanê xo. La nika ma reyna agêrayî dewa xo. Xeylê kesî bajaran ra tepîya agêrayî dewa xo.”