Elfazî Toral

 

STENBOL - Pîrebokê Kampusî çarçeweya kampanyaya bi nameyê ‘ma do bibedilnê’ de bi tîyatroyê raşteyî reyde hewl danê xeylê bajaran de xo biresnê cinîyan û wina vatî: “Ma torinê pîrebokê ke şima nêeşkayî peynîya înan bîyarî yê. Bi hêzo ke ma înan ra girewte ma tîya de yê. Seba ke bêhêvî nêbo ma vanê ke hêzê ma yo ke ma bibedilnê esto.” 

 

Pîrebokê Kampusî ke cinîyê unîversîteye ra pê yeno, amfî, unîversîte, raşte û her ca de çalakî, bername û kampanyayê xo yê vera zîhnîyetê serdestî rayra benê. Kampanyaya Pîrebokê Kampusî yê bi nameyê ‘Ma do bibedilnê’ zî eleqeyêk gird vînena. Seba ke cinî hîna baş vengê xo bida eşnawitiş bi na kampanyaye hîkayeya xoverdayîşê cinîyê ke ameyî pelçiqnayîş bi tîyatroyê raşte û xeylê bernameyanê cîyayan vejenê vernî. Nika Stenbol û Anqara de bername pê yenê û demê verênan de do bajarê bînan de zî pê bêrê. 

 

Cinîyê ke rêçê xo verdayî...  

 

Çarçeweya kampanyaye de karakterê ke yenê destgirewtiş Lîlîth, pîrebok, Virginia Woolf, Wayê Mirabal, Rosa Luksemburg, Konca Kuriş, Nezihe Muhittin, Çilem Dogan, cinîyê ke xoverdayîşê Gezî de bi têkoşînê xo yenê zanayîş û xeylê cinîyê bînî ca gênê. Lîlîthe ra heta Wayê Mîrabalî hîkayeya cinîyan yena dest girewtiş.  

 

Pîrebokê Kampusî ra Ceren Guner û Eylul Karaye derheqê kampanya û têkoşînê cinîye de JINNEWSî rê qisey kerdî.  

 

Kampanyaya înan têkoşînê cinîye vana  

 

Pîreboka Kampusî Ceren Gunere dîyar kerd ke prosesêk giran xo peyde verdayî û vat: “Badê prosesê giranî cinîyê ciwanî kewtî rewşa bêhêvîtîye. Ma coka ra prosesê neweyî de kampanyaya ‘ma do bibedilnê’ da destpêkerdiş. Hêzo ke bibedilno û newera awan bikero esto. Ma waşt ke ma têkoşînê cinîyan ke tarîx nuştî bi tîyatroyî bivejnê aver.” 

 

‘Meşaleya têkoşînî’  

 

Cerene dewamê qiseykerdişê xo de da zanayîş ke tîyatroyê bajarî her hetî ra eleqeyêk gird vîneno û nê çîyan vat: “Hêvîdara ke no tîyatroyê ma seba heme cinîyan bibo moral. Ma hêz daye heme kesê ke paştîdayîş danê têkoşînê cinîye. Wexto ke ma nê tîyatroyî kerd, ma têkoşînê cinîye ra hêz girewt. Ma bi destkewtiş, têkoşîn û tecrubeyê îna tîya de yê. Bi tîyatroyî ma mesajê domnayîşê têkoşînî danê. Ma vengê cinîyan danî eşnawitiş û xo resnenê înan. Ma tîya ra pê eşkenê her ca de kaliban bişiknê û bibedilnê. Çike hêzê ma esto.” 

 

‘Ma torinê pîrebokê ke şima nêeşka çinî bikerê yê’ 

 

Eylul Karaye zî ard ziwan ke aye tîyatroyê raşteyî de fîgurê ‘pîrebokî’ kay kena û wina ercnayîşê kerd: “Ma her tim vanê. Ma torinê pîrebokê ke şima nêeşka peynîya înan bîyarê yê.  Karakterê ‘pîrebokî’ ke verê cû zanayîşê xo vera û şîfadayîşê xo vera ameyêne qetilkerdiş û veşênayîş, karakterêk zaf muhîm o. Polîtîkaya hêrişî ya îqtîdarî vera prosesê peyênan de çalakîyê ma binê abluqayan de derbaz beno. La vera hende astengîyan reyna zî ma pê anê. Ma tarîx de ameyî qetilkerdiş, çinîkerdiş. Têkoşîn do dewam bikero. Ma bi nê çîyî hêvî da cinîyan.”