ANQARA - Zerrîwaza EŞÎKî Ozgul Kapdane vera polîtîkaya dişmenîye ya îqtîdarî ya vera cinîye de venga têkoşînî kerd û vat ke cinîye vera polîtîkaya îqtîdarîye de mîyanê şerî de yê. 

 

Îqtîdarê AKP-MHPyî badê weçînayîşan destkewtişê cinîyan hedef girewt û tewr peynî hemkarê xo yê neweyî HUDA-PAR û Partîya Refaho Neweyî reyde meclîs de seba kerdoxê hemverê cinîyan ke suc kerdî raştkerdişêk ‘efu’ kerdişî kerd qanûn.  

 

Zerrîwaştoxa Platformê cinîyan a Seba têduştîye (EŞÎK) Ozgul Kapdane derheqê babete de ercnayîş kerd.  

 

‘Têgêrayîşê cinîyan tena ame verdayîş’ 

 

Ozgule dîyar kerd ke têgêrayîşê cinîyan tena ame verdayîş û wina vat: “Ganî ma heme prosesî temamî bivînê. AKP xeyalê komelo ke wazeno awan bikero, serê cinîyan de keno cuye. Bi sîstemê 4+4+4î no serra 2008î de dest pêkerd. Ganî sey têgêrayîşêk vera zîhnîyetê komelî de biameyêne destpêkerdiş. Dimayê nê çîyî xeylê qewimîyayîşî dest pêkerd. Vatî ‘ma bi têduştîya cinî û camêrdî bawer nêkenê, vera fitratî yo’. 2010î ra heta nika no rojev de ame verdayîş. Na babete de têgêrayîşê cinîyan tena verdayî. Heta betalkerdişê Peymana Stenbolî her kesî vatêne nê do hende zî nêbo. La ame dîyîş ke çîyo ke wazenê no yo. Nika seba ke binkewtişê ekonomîye nêro qiseykerdiş desturê bingeyîn eştî raşte.”  

 

‘Ma reaksîyono ferz nêdî’ 

 

Ozgule ard ziwan ke EŞÎKî seba partîya înan munaqaşayê desturê bingeyîn de tewrê pêvînayîşan bibî, têkoşînêk gird ê qenehkerdişî dayî û vat: “Her îmkanî de ma waşt ke vajî îqtîdar wazeno se bikero. Weçînayîşan ra ver vatî, bername û waştişê Partîya Refaho Neweyî û HUDA-PARî yê AKPyî ra xoser nîyê. No bernameyêk hukmatî bî. Vatêne wazenê weçînitoxê tarîkatî zî destê xo de biverdê. La wina nêbî. AKP zî nêwaşt. AKP çîyêk winasî wazeno. Rewşa ewro meclîs de zî wina ya.”  

 

‘Wazenê kaosêk awan bikerê’  

 

Ozgule da zanayîş sûcê edlî zêde bîyê û nê çî vat: “Bi qanûnê tewreyî reyde sûcê edlî zêde bî. Îqtîdar wazeno hawirê kaosî awan bikero û bêşik yê tewr zêde nê ra zirar vînenê cinî û tut ê. Qanûnê tûrikî derbaz bî. 408 parlamenterî tewrê raydayîşî bî. Seba reaksîyonê lazim nêame mojnayîş, kiştoxê cinî û tutan ameyî efûkerdiş. Çîyo tewr komîk zî oyo ke do prosesê tepiştişê sûcê edlî zaf kêmî bibo. Merdim bi rastî mat maneno. Wazenê kaos awan bikerê û cinî û tut, LGBTî bêrê çinkerdiş. Gelo do cinî hema çiqas bedel bidê. Cinî xora bedel danê. Cinî xora mîyanê şerî de yê. Şer kenê. Çîyo ke cinîyan rê yeno waştiş leşker û karkerê erjan bîyarê dinya. Bêcezaverdayîş eşkeno seretewênayîşî zî xo reyde bîyaro.”

 

'Ma do hemverê hêrişan de xebatê xo rayra berê’

 

Ozgule peynîya qiseykerdişê xo de da zanayîş ke ê do têkoşînê xo dewam bikerê û wina vat: “Cinî tedayê rejîmî vînenê hîs kenê û zanê. Hemverê nê ma  çend çîyan fikrîyenê. Parlamenterê demokrat zî ci de bi parlamenterê cinîyan reyde ma do bixebityê. Ma do hemverê hêrişan xebata xo dewam bikerê. Hêvîdar a ma do serbikewê. Do hêrişî zêdeyêr bibê. La ma do têkoşînê xo dewam bikerê.”