Rabîa Onver

 

COLEMÊRG - Parlamentera Partîya Çep a Keske Oznur Bartin derheqê dewaya şikdarê ke destdergîyê ke Esra Y. rê kerd û bêtepiştiş yeno muhakemerdiş û vat: “Seba şikdar sûcê bînî nêkerê, cuyê bînan tarî nêkerê ganî lezabez bêrê tepiştiş.”

 

27ê Gulana 2016ine de dewêke qezaya Şemzînanî ya Colemêrgî de 3 kesê bi nameyê Veysî, Zahir û Nîhat Yilmaz tecawuzî Esra Y. a 11 serrî kerdibî. Çarçewaya prosesê huqûqî yê ke tute merdimanê xo rê qalê hedîse de kerd de 3 kerdoxî ameyî tepiştiş, dewa Dadgeha Cezaya Girane ya Geverî de ameye vînayîş. Seba 3 kerdoxan seba sûcê “îstismarê cinsî” û “bêparverdayîşê azadîye” her yewî rê 42 serrî cezaya zîndanî ameye dayîş. Dimayê îtîrazê kerdoxan ê Dadgeha Îstînafî ya Herême, ceza ameye betalkerdiş û seba kerdoxan qerarê newe ra muhakemekerdişî ame dayîş.

 

Labelê 8 aşmî dima kesê ke seba “nêbîyayîşê delîlan” ameyî veradayîş. 11 rojî dima kerdoxî ameyî veradayîş. Veradayîşê ê kesan bi sebebê  întîxarê Esraye. 9ine roniştişê dewaya 17ê Temmuze de Dadgeha Cezaya Giran ya Geverî de ame vînayîş. Roniştiş de heyetê dadgehe bi sebebê beşdarbîyayîşê kerdoxan ê roniştişê waştişê tepiştişî de red kerdibî.

 

Parlamentera Partîya Çep a Keske ya Colemêrgî Oznur Bartin derheqê babete de ercnayîş kerd.

 

Oznure da zanayîş ke Esra hetê hîrê şikdaran ra ameya tehdîdkerdiş, şantaj ci rê ameyo kerdiş û dimayê ke çîyê ameyê sereyê ci qal kerda, prosesê huqûqî dest pêkerdo û wina vat: “Esra Y. 21ê hezîrana 2016ine de serdozgerîya komare ya Şemzînanî de îfade da. Îfadeyî de dîyar kerdebî ke Veysî, Zahîr û Nihat Yilmaz dîmenê ci antê, bi ê dîmenan aye û keyeyê ci bi mergî tehdîd kerdê, ame tepiştiş û 42 serrî ceza ci rê ame birnayîş. La ceza hetê dadgeha îstînafî ra ameye xirakerdiş û 6 aşmî dima şikdarî ameyî veradayîş. 11 rojî dima zî Esra Y. întîxar kerd. Dewa ke ciwîyayîne de binê  zinarêke de ameye vînayîş. Esra bişik dinyaya xo bedelnaye. Esra travmayê pîlî ciwîyabî û no rojaneyê aye de bi eşkera yeno vînayîş.”

 

‘Kesê ke suc kenê cesaret gênê’ 

 

Oznure da zanayîş ke kesa ke na rewşe ciwîyaya tutêka 11 serrî ya û wina dewam kerd: “Çîyê ke aye ciwîyaya tu wijdan, huqûq û merdimîye de çin o. Esraye netîceyê xeleka binpaykerdişê heqan de cuya xo vînî kerda. Keso ke Esraye bi mergî tehdîd kerdî serbest ameyî verdayîş. Mergê Esraye meşru kerdî. Sucê vera cinî û tutan bê ceza manenê. Destdergê bi Esraye ame kerdiş, tehdîd û şantaj ame kerdiş. Kesê ke Esraye ver bi zinarî ra berdî hemkarê sucî yê. Her çend ke mergê Esraye sero ra 7 serrî derbaz bibo zî kerdox teber de yê. Kerdoxî muhakeme ra cesaaret gênê.” 

 

‘Ganî bi lezkî kerdoxî bêrê tepiştiş’ 

 

Oznure dewamê qiseykerdişê xo de vat ke roniştişê 17ê Temmuze de mehkema cezaya girane ya ke Gever de ameybî dîyîş de kerdox Veysî, Zahîr û Nîhat Yilmazî avûkatê Esra Y.ye, pîyê aye Bazid Y.yî û birayê ci Selîm Y.yî tehdîd kerdî û nê çîyan vat: “Merdimê kerdoxan keye ra vatî ke ‘şima fek gerreyê xo ra nêverdê do şima ra yew bêro kiştiş, eke ma ra yew bêro tepiştiş do şima ra yew bimiro’. Tehlîyeya kerdoxan vera vernîya sucî yena akerdiş. Ganî bi lezkî peynîya nê bêhuqûqîyan bêra û edalet pê bêro. Nika ke kerdoxî sewbîna sucêk nêkerdî ganî bi lezkî bêrê tepiştiş. Îqtîdarîya ke vernîya kiştişê cinîyan akeno bi nê çîyan zî sînordar nêmaneno û seba ke kerdoxî ceza nêgîrê zî hewl danê. Ma na dewaya Esraye zî vînenê. Serekê AKPyî yê Colemêrgî Zeydîn Kaya û kênaya xo tewrê roniştişî benê. Na rewşe hetê sîyasetî de eybêk gird a. Na rewşe netîceyê dişmenîya hemverê nasnameyê cinîye pê yeno.” 

 

‘Ma do têkoşîn bikerê’  

 

Oznure qiseykerdişê xo wina peynî kerd: “Ma do taqîpkarê na babete bibê. Heta ke edalet pê nêro ma do têkoşînê xo dewam bikerê. Tena ma nê heme kesê wayîrê wijdan, kesê ke têkoşînê huqûqî danê seba na dewaye hewl danê. Ma venga xo newe kenê. Ganî dewaya Esra Y.ye bi heme hetan bêra cigêrayîşkerdiş û edalet pê bêro. Seba roşnkerdişê hedîseyî ma meclîs de zî xebate rayra berd û ma rayra benê.”