Elfazî Toral 

 

STENBOL - Tepişteya binameyê Fatma Ozbaya ke nêweşîya rîşa merdimwere ya çije aye de esta, 25 serrî ya tepişte ya û zîndanê Şakranî ra ne yena serbest verdayîş, ne zî yena dermankerdiş. Avûkatê Fatmaye dîyar kerdî ke tecrîdê zîndanan giran bîyo û ganî têkoşîn bêro dewamkerdiş. 

 

Binpaykerdişê heqan ê zîndanan roj bi roje giran benê û bi raporê Dezgehê Tibê Edlî (ATK) yê sey ‘eşkenê tepişte bimanê’ tepişteyê nêweşî serbest nînê verdayîş û înfazê înan yeno veşênayîş. Goreyê dayeyê ÎHDyî nê tepişteyê giranan ra yew zî Fatma Ozbaye ya.  

 

Cuyêk surgunkerde… 

 

Fatmaye serra 1965î de dewa Surbexanajorî ya Bazidê Agirîye de ameye dinya û 5 waye û bira yê. Serra 1998î de Şirnex de yena destbendkerdiş û 36 serrî ceza aye rê yena birnayîş. Fatmaye surgunê Amed, Mîdyad, Bayburt, Erzirom û Şakranî yena kerdiş. Fatmaye Zîndanê Tîpê Tyî yê Şakranî yê Alîagaye de manena.  

 

Nîna dermankerdiş  

 

Serra 2018î de teşhîsê rîşa merdimwere ya çije aye rê ame ronayîş. Eynî serre de amelîyat bî û 4 nodul aye ra ameyî girewtiş. La vera rîskê rîşa merdimwere vilayê rahîm, heste û kesebaya sîya ya aye vila bîya zî vîşêrê fîlm, 8 seans kemoterapî û radyoterapî tu dermankerdiş nêame kerdiş. Fatmaye vera nêweşîya girane ne yena serbest verdayîş û ne zî yena tehlîyekerdiş. Fatmaye 25 serrî yo tepişte ya û vera heme nêweşîyan têkoşînê xo dewam kena. 

 

Avûkatê tepişteya nexweşe ya girane Fatma Ozbaya 59 serrî sere de derheqê Fatmaye û derheqê bêhuqûqîyê zîndanan de JINNEWSî rê qisey kerdî.   

 

‘Zîndan bîyî cayê probleman’ 

 

Avûkatê Fatmaye dîyar kerdî ke şirawitişê kitab, rojname û weşanan de problemî yenê ciwîyayîş û vat: “Caardişê kêfî, aktîvîteyê komelkî, sewqkerdişê nêweşxaneyan bi problem ê. Miqatebîyayîşêk baş, herînayîş û dayîşê kantînî bi problem ê. Zîndanî bîyê cayê probleman. Zîndan rincanbîyayîş û cayê acizîye yo.” 

 

Tîpê tecrîdî  

 

Avûkatê Fatmaye dayî zanayîş ke tepişteyê cinî bi xeylê binpaykerdişê heqan reyde yenê rî bi rî û tepişteyê sîyasî her tim bi polîtîkayê binpaykerdişî reyde rî bi rî manenê. Avûkatî wina vatî: “Zîndanan de tecrîdêk giran yeno rayraberdiş. Her tîp zîndan, tîpê tecrîdê newe yo. Çîyo ke ci rê vanê înfaz esasê xo de îzolasyon o.”  

 

‘Ma do heqanê xo bigîrê’  

 

Avûkatî tewr peynî wina vatî: “Tepişteyî do têkoşînê xo dewam bikerê. Huqûqê bîyaye serê caardişê heqan de ameyo awankerdiş. Yew tesîrê huqûqê pêroyî no yo ke haletê îdeolojîk şîyo. Coka ra huqûq bê het o. Aîdê çîn ya zî koma îqtîdarî yo. Salona mehkema, dozger, dadger û avûkatî estê la edalet çin o. Seba tepişteyê 30 serrî îdare qerar dano. Huqûqê dişmenîye pê anê. La ma do têkoşîn bikerê û heqanê xo bigîrê.”