Elfazî Toral

 

STENBOL - Partîya Çep a Keske û HDP badê weçînayîşan pêvînayîşê şarî dayî destpêkerdiş û her hetî ra hemwelatijî tewrê kombîyayîşan benê. Pêvînayîşê şarî de rexne, xorexnekerdiş, ercnayîş û pêşnîyarî yenê girewtiş. Rayîrberê partîye dîyar kerdî ke do têkoşînê xo gird bikerê. 

 

Partîya Demokratîke ya Şaran (HDP) û Partîya Çep a Keske badê weçînayîşan kombîyayîşê şarî dayî destpêkerdiş û hîri herêmê girdî yê Stenbolî de pêvînayîşê şarî dewam keno. Şar eleqeyêk gird mojneno kombîyayîşan û serê babeta girdkerdişê rêxistinbîyayîşî de yeno vindertiş. Yeno pawitiş ke do kombîyayîş 30ê Temmuze de peynî bibo. 

 

Rayîrberê Partîya Çep a Keske ya Stenbolî derheqê kombîyayîşê şar û cinîyan de ercnayîş kerdî. 

 

Têkoşîn û azadîya cinîye esas yeno girewtiş  

 

Endama Partîya Çep a Keske ya Sultanbeylîyî Zubeyde Înceye wina vat: “Badê weçînayîşan ma kewtî prosesêk newe yê rêxistinbîyaye. Ma vera nîjadperestî, yewperestî û netewperestîye de yê. Ma şar û heqîqetî esas gênê. Ma muhîmî danê azadî û têkoşînê cinîye. Cinî azad biba komel zî azad beno.” 

 

Têkoşîn bi waştişê şarî gird beno 

 

Zubeydeye dîyar kerd ke qezayê Stenbolî bi cinîyan reyde yenê têkişt û wina qisey kerd: “Ma rexne, pêşnîyaz û waştişan goşdarî kenê. Ma goşdarî kenê û têkoşînî gird kenê. Ma sîstemê feodalî red kenê. Ma şarî pawenê. Tu hêzêk nêeşkeno heqîqetî çinî bikero. Pêvînayîşê cinîyan muhîm o. xelisnayîş bi têkoşînî mumkun o. cinîyî nê çîyî zanê. Her kes nê sîstemî ra gerreyin o. ma venga heme cinîyan kenê. Yewine xelisnayîş HDP û Partîya Çep a Keske yo." 

 

Pêvînayîş ameyî kerdiş 

 

Hemsereka Partîya Çep a Keske ya Stenbolî Beser Çelîke zî bale ant serê pêvînayîşê bi şarî reyde û da zanayîş ke no seba cinî û ciwanan xeylê muhîm o û wina vat: “Ma bi şarî reyde prosesî ercna. No xeylê muhîm o. weçînayîşê herêmî xeylê muhîm o. Îradeyê şarî seba ma muhîm o. Kombîyayîşê şarî û cinîyan seba ameyoxî îmkanêk o û xeylê muhîm o. munaqaşa û ercnayîşê kombîyayîşan zaf muhîm o. ma do demêk nizdî de bi konferansî netîce û munaqaşayan biercnê. Wa her hetî ra şar kombîyayîşan de vatişê xo bivajo. Tewrbîyayîşê cinîyan ê kombîyayîşan xeylê muhîm o. Ganî vatişê xo bivajê.”