Oznur Deger

 

MÊRDÎN - Taxa Hêşerîya Qoserî de 8 rojî ceyran ame birnayîş û roniştoxê taxe dîyar kerdî ke dewlete leşkeran gêna û yena û vatî ke tu heqê înan çin o ke nê bikerê.

 

Rojê vîyarte de Vilakerdişê Ceyranî yê Dîcle A.Ş (DEDAŞ) 95 dewanê  Qoser û Dêrikî yê Mêrdînî dîyar kerdî ke 3yê Temmuze de ceyran birna û 16 rojan do dewam bikerê. Roje de 9 saetî birnayîşê ceyranî ke tesîr serê pêro dewijan de kenê, açarya îşkence. Roniştoxê dewa Dixê û Hêşerî yê Qoserî 6ê Temmuze de bi keya û avûkatan reyde muracatê dozgerîya Qoserî kerdî û derheqê midûrê DEDAŞî Halîl Homan û îdarekarê DEDAŞî de gerre kerdî. Dadgeha Huqûqî ya Asliye ya Qoserî 10ê Temmuze de qerar da û vat, do birnayîşê ceyranî roje de hîrê saetî bibo.

 

Dewijanê Hêşerî dîyar kerdî ke 10ê teşrîna verêne de qerar ameyo girewtiş û ceyran ganî 18.00ine de biameyîne 21.00 de ameyo veradayîş û 11ê Temmuze de zî bi sebebê kablo visyayo, ceyran bi saetan ameyo birnayîş.

 

Birnayîşê ceyranî de awe û şebeke yenê birnayîş

 

Dewa ke 3 hezar zêdeyêr nufusa ci esta, germbîyayîş zî 40 derece derbaz kerdo û birnayîşê ceyranî zî rayîr ver bi problemê hîjyen, weşîye akenê. Birnayîşê ceyranî beno sebebê problemê awe û şebeke.

 

‘Her serre çinitişê gilgilî de ceyran birnenê'

 

Dewijan ra Nofa Ertaş reaksîyon vera birnayîşê ceyranî mojna û vat: "Seba ma genim û gilgil arênêdê, ceyran birnenê. Merdimî tîya bi çinitş debare kenê. La ê yenê nê mewsîmî de ceyran birnenê. Demo ke mewsîm qedêno, ceyran vera danê. Nîmeyê dewe nêweş o. Nêweşîya min a şekir û tansîyonî esta. Birnayîşê ceyranî tesîrêk pîl serê ma de keno. Nêweşîya ma tewr giran bena. Bi hawayêkê keyfî têgêrenê."

 

‘Dewlete bi leşkeran yena’

 

Nofa da zanayîş ke dewlete leşkeran gêna verê xo û bi otobusan yena û vat: “Gilgil û genimê ma verê berî de yê. Êdî pere nêkenê. Na aşme ra tepîya ma nêeşkenê gilgil weçînê. Yê ke ma çinitê zî seba nînê awdayîş huşk benê. 10 rojî yo awe çinbî. Tu çîyêk çinbi. Ma nêeşkayîne werd biviraştêne. Her serre ma nê problemî ciwîyenê. Ma ra çi wazenê? Na aşme biqedo, do rehet bibê. Qerarê dadgehe zî goşdarî nêkenê. Seba ke ma kurd ê ma rê zulm kenê. Cayê ke tirkî uca de ciwîyenê, ceyran nêbirnenê. La tîya bi aşman bê ceyran manenê.”

 

‘Ma citkar ê la ma nêeşkenê gilgil weçînê'

 

Fesla Dayan zî dîyar kerd ke bi 10 rojî yo ceyran birnayê û vat: "Ma mîyanê roje de german ra nêzanê se bikerê û xo erzenê binê versîya daran. Emrê ma zêde yo û nêweşî zêde bîyê. Ramitişê ma erd de maneno. Çira ceyranamê ma birnenê? Ma nêeşkenê vejîyê teber. Seba ke ceyran çin o ma nêeşkenê gilgil weçînê. Ma citkar ê û yewin çimeyê debara ma no yo."

 

Durîye Ertaş zî wina reaksîyon mojna: "Bi rojan o ma bê ceyran ê. Nêweşî zêde bîyê û germ tesîrê nê keno. Ma nêeşkenê tasêke awa cemedî bişiminê. Berardişê ma erd de mend. Ceyranê ma çira birnenê? Ma mexdûr ê. Qey ma vêşan bimanê? Zulm bima kenê. Ma ra çi wazenê? Gelo wazenê ma bikişê?"